Chacha-56

چچا چھپن(56)

 ڈاکٹر مبین نذیر)مالیگاؤں مہاراشٹر(

 

آپ نے نہیں تو آپ کے ممی پاپا نے چچا چھکن کے کارنامے ضرور پڑھے اور سنے ہوں گے ۔  کبھی موبائل سے فرصت ملے تو ان کے کارنامے ضرور سننا ۔ چچا چھکن اب رہے نہیں لیکن ان کی وراثت ان کے قابل بھتیجے چچا چھپن سنبھالے ہوئے ہیں ۔چچا چھکن کے بعد اگر کسی نے خاندان کی عزت بچائی ہے تو وہ ہمارے چچا چھپن ہیں ۔چچا چھکن کی طرح چچا چھپن کا اصل نام بھی ان کے کارناموں کے نیچے اتنا دب دیا گیا کہ خود انھیں بھی اپنا نام یاد نہیں رہتا ۔ وہ پانچ بہنوں اور چھ بھائیوں میں سب سے چھوٹے تھے ۔ ایک مرتبہ اسکول میں خاندانی معلومات کا فارم بھر  کر لانے کے لیے دیا گیا  تو چچا پانچ کے آگے چھ لکھ کر لے آئے ۔ ٹیچر نے چھپن کا عدد دیکھا تو حیرت سے پوچھا کہ،’’چھپن بھائی بہن ؟‘‘

’’نہیں، پانچ بہن اور چھ بھائی۔۔۔۔۔‘‘

اتنا کہنا تھا کہ پوری کلاس قہقہوں سے گونج اٹھی ۔ اسی دن سے ان کا نام  چھپن پڑ گیا ۔ کلاس تو کلاس، محلے میں بھی وہ اسی نام سے مشہور ہو گئے ۔ چونکہ چچا چھکن کے بھتیجے تھے، اس لیے اپنے چچا کے ہم وزن نام کو خوش دلی سے قبول کر لیا ۔ کچھ اور بڑے ہوئے تو چچا چھپن کہلانے لگے اور ہر معاملے میں چھپن کو مقدم کرکے دکھا دیا ۔

چچا نے بہت کوشش کی کہ نکاح بھی چھپن تاریخ کو ہی کریں اور کسی چھپن سالہ دوشیزہ سے کریں مگر قسمت نے ساتھ نہیں دیا تو پانچ جون کو چچی کو ہی قبول کر لیا ۔بائک خریدی تو اس لکی نمبر کے لیے زائد پیسے ادا کیے ۔ موبائل نمبر بھی ایسا پسند کیا جو موبائل نمبر کم اور چھپن کی سیریز زیادہ معلوم ہوتا تھا ۔ ورزش شروع کی تاکہ سینہ چھپن انچ کا ہوسکے ۔ سینہ تو چھپن انچ کا نہیں ہوسکا البتہ وزن کم ہوکر چھپن کلو رہ گیا ۔وزن میں کمی بیشی نہ ہو اس لیے چچا ترازو لے آئے اور صبح شام وزن چیک کرنے لگے۔

جس دن وزن کم یا زیادہ ہوتا اس دن چچا کا پارہ چڑھ جاتا اور چچی سمیت بچوں کی شامت آجاتی ۔ کبھی وزن بڑھانے کے لئے ڈاکٹر کے پاس جارہے ہیں تو کبھی وزن کم کرنے کے لیے حکیم صاحب کے یہاں چکر لگارہے ہیں ۔ وزن کے چکر میں کمزوری بڑھنے لگی تو مزاج میں چڑ چڑا پن آگیا ۔ معمولی باتوں پر ان کا پارہ چھپن ڈگری اوپر چلا جاتا تو دوسرے ہی پل اتنا ہی نیچے جانے کے لیے بے تاب ہوجاتا ۔ مزاج اور یادداشت کے معاملے میں وہ چچا چھکن سے دو قدم آگے تھے ۔

اپنے جڑواں بچوں جمن اور اچھن کی بائک لینے کے لیے گھر سے نکلے اور دونوں کو لے کر سائیکل کی دکان پر پہنچ گئے ۔ بچوں کے یاد دلانے پر شوروم پہنچے تو بچوں کو نئی بائک دلادی لیکن گاڑی کے رجسٹریشن کے لیے خود تشریف لے گئے اور چھپن چھپن نمبر کے لیے زائد رقم ادا کی ۔

جب بچوں نے وہی گھسا پٹا نمبر دیکھا تو ناک بھوں سکوڑے ۔کیوں کہ کالج میں دوست انھیں اس خاص نمبر کے اہتمام کی وجہ سے تنگ کرتے تھے ۔ چچا چھپن نے اعلان کر دیا کہ گاڑی کا نمبرپسند نہیں ہے تو پیدل ہی کالج جائیں ۔مرتا کیا نہ کرتا کے مصداق جمن اور اچھن نے بائک تو لے لی لیکن نمبر پلیٹ اس طرح بنوائی کہ چھپن بڑے غور سے دیکھنے پر دکھائی دیتا تھا ۔

چچا کو ترکہ ملا تو چچا چھپن نے پلاٹ خریدنے کی ٹھانی ۔ سارا کنبہ پلاٹ دیکھنے گیا مگر چچا کی نگاہ میں پلاٹ کے محل وقوع سے زیادہ اہمیت اس کے نمبر کی تھی۔ چچی اور بچوں کو لب ِ سڑک کا پلاٹ پسند آیا تو چچا نے نشیب میں واقع اپنے پسندیدہ نمبر کا پلاٹ پسند کیا ۔ چچی کا پسند فرمودہ پلاٹ کارنر کا پلاٹ تھا ۔لیکن چھپن کے کرشماتی نمبر کی وجہ سے چچا نے آخری پلاٹ کا سودا کرلیا ۔ جہاں ہر وقت بارش کا پانی اور گندگی جمع رہتی تھی ۔ چچا نے اس کی یہ فضیلت بیان کی کہ گندگی اور کیچڑ کی وجہ سے کوئی اس پلاٹ پر ناجائز قبضہ نہیں کرسکے گا اور نہ ہی کوئی ایسا پلاٹ خریدے گا اور ہم اسٹیٹ بروکرس کی دھوکہ دہی سے محفوظ رہیں گے ۔ چچا کی اس منطق پر اسٹیٹ بروکر جو اس پلاٹ کو دکھا رہا تھا ، صدمے کی وجہ سے گرتے گرتے بچا اور گھر والے مسکرا کر رہ گئے ۔ چچی کے دماغ پر بھی چھپن کا عدد کچھ اس طرح سے سوار تھا کہ وہ کبھی کبھی بے خیالی میں اچھن کے ابا کی بجائے چھپن کے ابا پکار اٹھتی تھیں اور چچا بجائے ناراض ہونے کے کھل اٹھتے تھے ۔ البتہ چچی چچا کے اس محبوب نمبر کو اپنی سوتن سمجھتی تھیں ۔ چچا کی چھپن دوستی پر کڑھ کر کہہ اٹھتیں، "آپ کو مجھ سے زیادہ تو یہ چھپن عزیز ہے۔

چچا مسکرا کر کہتے ، نہیں بیگم، ایسا نہیں ہے ۔ تم میری محبت ہو اور چھپن میری عقیدت اور چچی شرما کر رہ جاتیں ۔

جمن اور اچھن میں سے جس کو امتحان میں چھپن مارکس ملتے تھے چچا اسے زیادہ انعام دیتے تھے ۔ دونوں بھائیوں نے چچا سے پیسے اینٹھنے کا یہ طریقہ دھونڈ نکالا کہ جو چیز پسند آجاتی، اس کی قیمت چھپن روپے بتاتے اور چچا موم ہوجاتے ۔ البتہ چچا کا ساری زندگی یہ معمول رہا کہ مغرب کی اذان کے بعد کسی کو ایک روپیہ بھی نہیں دیتے تھے ۔ بچے بھی مغرب سے پہلے ہی وصولی کر لیتے تھے ۔

چچا چھپن کے کارناموں کی تعداد بھی چھپن ہے ۔ چھپن کارناموں کے بعد چچا نے کارناموں سے توبہ کرلی تاکہ یہ نمبر کہیں کھو نہ جائے ۔اگر ہم چچا چھپن کے چھپن  کارناموں کو گنوانے بیٹھیں تو چھپن دفتر درکار ہوں گے ۔ اگر چچا چھکن زندہ ہوتے تو یقیناً اپنے بھتیجے کے کارناموں کو دیکھ کر یہی کہتے کہ تم نے نہ صرف ہمارے نام بلکہ کام کی بھی لاج رکھ لی ہے ۔

*****

PDF Download

#Chacha-56

Komal Joya

کومل جوئیہ کی شاعری کا فنی Funny 😉جائزہ

_________________________

نعیم سلیم، مالیگاؤں مہاراشٹر انڈیا 

🌺🌺🌺🌺🌺🌺🌺🌺

*منسوب چراغوں سے طرف دار ہواکے*

*تم لوگ منافق ہو منافق بھی بلا کے*

جیسے چبھتے ہوئے شعر کی خالق محترمہ کومل جوئیہ پڑوسی ملک پاکستان کی ایک باکمال شاعرہ ہیں.سوشل میڈیا کے توسط سے آپ کے کلام نظر نواز ہوتے رہتے ہیں. وطن عزیز ہندوستان بالخصوص شہر محبت مالیگاؤں کے ادب نواز حلقے میں موصوفہ کی شاعری کافی پسند کی جاتی ہے. خود ناچیز بھی محترمہ کے فن کے قدردانوں میں شامل ہے. آپ میں درد مند دل، شاعرانہ ذوق کے ساتھ ہی بہترین حس مزاح بھی پائی جاتی ہے. فیس بک اکاؤنٹ پر تازہ غزلیات، اشعار کے ساتھ مزاحیہ پوسٹ لگاکر پھلجھڑیاں بکھیرنا بہترین مشغلہ ہے. آپ کی شاعری پر ناقدین ادب لکھ رہے ہیں اور لکھتے رہیں گے. آج ناچیز اپنے ذوق کے مطابق آپ کی شاعری کا funny تجزیہ پیش کررہا ہے. مقصد آپ قارئین کو محظوظ کرنا ہے. محترمہ کومل سے پیشگی معذرت کے ساتھ 

اکثر شعراء کو یہ شکایت رہتی ہے کہ ہم اتنی محنت سے اشعار کو پروتے ہیں غزلیں نظمیں لکھتے ہیں مگر ہمیں وہ پذیرائی نہیں ملتی جو شاعرات کو ملتی ہے. بالکل یہی بات محترمہ کومل کو بھی پریشان کرتی ہے جب وہ پوسٹ لگاتی ہیں اور تھوڑی ہی دیر میں دو چار سو لائک کمنٹس آجاتے ہیں کہتی ہیں 

*میں کتنے دشمنوں میں گھر چکی ہوں حیرت ہے* 

*کہاں سے آگئے یہ لوگ ان کے نام ہیں کیا؟* 

ہر چند نام نظر آتے ہیں پوسٹ میں مگر پہچان کے تو چند ایک ہی ہوتے ہیں. باقی واہ واہ کرنے والی پوری ایک انجان فوج ہوتی ہے... 

شاید وہ کچھ لوگوں سے دھوکہ کھاچکی ہیں اسی لئے فرماتی ہیں کہ 

*میں ایسے اژدھوں کے بارے میں بھی جانتی ہوں*

*جنھوں نے دوستوں کے روپ دھارے ہوتے ہیں*

 

اتنے لائک کمنٹس کسی شاعر کو مل جائیں تو وہ خوشی سے پاگل ہوجائے مگر محترمہ بہت محتاط رہتی ہیں مزید کہتی ہیں کہ

*مری صفوں میں یہ سارے منافقین نہ ہوں*

*ہرا نہ دے کہیں اپنی مری سپاہ مجھے*

تو آپی اپیا کے نعرے بلند کرنے والے فالورس اپنی کمنٹس میں محترمہ کو یقین بھی دلادو کہ آپ لوگ کبھی آپی اپیا سے غداری نہیں کروگے..

پھر انہیں کبھی یہ نہیں کہنا پڑے گا کہ

*اتنے دشمن تو خدایا کسی دشمن کے نہ ہوں*

*ہاتھ جھٹکوں تو کئ کف سے نکل آئیں گے*

آپ جتنی خوب صورت اور معصوم نظر آتی ہیں اس سے زیادہ خوش مزاج ہیں. لیکن بار بار مزاج اور خیریت پوچھنے والوں کو یوں ٹکا سا جواب دیتی ہیں کہ

*مرے مزاج کے بارے میں پوچھنے والو*

*میں بد مزاج سی لگتی نہیں ہوں، ہوں بھی بہت*

مل گیا نا جواب! اب مت پوچھنا کیسے مزاج ہیں.........

  خواتین اور اپنی بات کے آگے مقابل کی بات مان جائیں؟ قطعی نہیں ہوسکتا. 

*میں اپنے حق میں کی اک بات بھی نہیں مانوں* 

*میں مسترد کروں ساری دلیلیں تم کو کیا؟* 

جب خود کے حق میں دلیلیں نہیں مان رہی ہیں تو اندازہ لگایا جاسکتا ہے کہ خلاف کا عالم کیا ہوگا. پوری غزل ہی ایک دم لڑنے جھگڑنے کے انداز میں لکھی گئی ہے. پڑھنے سے تعلق رکھتی ہے. 

گھر میں بچوں کے ساتھ کھیلنا اچھے ماں باپ کی نشانی ہے. موبائل عہد میں بچے آج بھی چور پولس کھیلتے ہیں. 

محترمہ کی بچی نے پلاسٹک کی بندوق سر پر تان دی اور تین تک گنتی کی مہلت دی یہ چیختی رہیں دس تک مگر افسوس تین پر ہی انہیں ڈھیر کردیا. 

*اس نے بس تین تلک گن کے مجھے مار دیا* 

*میں نے سو بار یہ آواز لگائی دس تک* 

خیر بچوں نے بھی وعدہ کرلیا ہے اگلی بار دس تک پوری گنتی کریں گے...

ماشاءاللہ گھر پر بہت کام کرتی ہیں. جس سے تھک جانا فطری امر ہے. اور کام کی زیادتی سے بھلا کیا دھیان رہتا ہے. کہتی ہیں کہ

*میں لڑکھڑا کے گری اپنے دھیان چلتی ہوئی*

*گلے سے آکے لگی جب تھکان چلتی ہوئی*

درخواست ہے کہ کام کو خود پر اتنا سوار نہ کریں کہ تھک کر گرجائیں. صحت پر دھیان دیں.

صحت سے بڑھ کر کوئی دولت نہیں ہے..

اسی طرح خیالوں میں گم رہنا اچھی بات نہیں ہے. جب یاد آئے تو میاں سے کال ملالینا چاہیے. سروس میں اتنی بھی پابندیاں نہیں ہوتیں کہ بندہ اپنی بیوی کی کال بھی ریسیو نہ کرسکے.

*ترے خیال نے رستہ بھلا دیا ہے مجھے*

*میں چھوڑ آئی ہوں پیچھے مکان چلتے ہوئے*

اور پھر بات بات میں دعا دینے کی کتنی اچھی عادت ہے میاں کو قطعی برا نہیں لگے گا اس بات کا

*تو مسکرا کے مجھے دیکھ میں دعا دوں گی*

*یہ صدقہ تیرے مسائل کو ٹال کر رکھ دے*

حسن وعشق کی باتیں تو شاعری کی جان ہوا کرتی ہیں اس کا احساس کرتے ہوئے کبھی کبھار چھوٹ دے دیا کرتی ہیں کہ

*اتنی سی چھوٹ تو بنتی ہے مرے عشق پرست*

*پاس بیٹھے تو مرا ہاتھ پکڑ سکتا ہے*

ویسے بندہ مارسے بچنے کیلئے بھی مقابل کا ہاتھ پکڑلیتا ہے.

بازار جاتی ہیں تو بہت محتاط رہنے پر بھی دھوکہ کھا جاتی ہیں کبھی نوٹ خراب تو کبھی سامان خراب، بڑا دھوکہ کھاکر فراڈیے کو یوں شکریے سے نوازتی ہیں کہ 

*ترے ہی دھوکے سے دنیا سمجھ میں آتی ہے*

*لہٰذا شکریہ اے شخص بے شمار ترا*

میاں سے لڑکر خود تو کئ غزلیں انا کی تسکین کیلئے لکھ مارتی ہیں مگر میاں ذرا بھی بے رخی بتائیں تو یوں گویا ہوتی ہیں

*تو ایک خاک کا انساں ہے میری جانب دیکھ*

*یہ بس خدا کو ہی جچتا ہے بے نیاز رہے*

بے رخی پر یہ عالم ہے تو سمجھ سکتے ہیں کہ محترمہ بے وفائی کو کتنا برا سمجھتی ہیں.مثال کے طور پر 

*نارسائی کا گلہ ہے تو فقط اتنا ہے*

*وہ میسر مری خواہش سے خدایا کم ہے*

لاک ڈاؤن نے اس گلے کو بھی ختم کردیا. سال بھر چوبیس گھنٹے میسر.. کرلو گل..

ویسے لاک ڈاؤن نامی بلا کے دور میں جہاں بہت سارے بڑے بڑے بزنس ختم ہوئے وہیں گھروں سے نئے بزنس بھی شروع ہوئے دکانیں تلاش کرنے کی ضرورت نہیں گھروں سے ہی سامان دستیاب. ایسے ہی ایک گھر کو دیکھ کر یوں فرماتی ہیں.

*اب مرے بعد میرے گھر میں پڑے ہوتے ہیں*

*عطر لوبان اگر بتیاں کافور چراغ*

موصوفہ کا گھر اسلئے نہیں لکھا کہ فینس کل سے ہی ان کے یہاں عطر اگر بتی لوبان وغیرہ لینے نہ پہنچ جائیں. اور مہکتے گلدستے کو خوشبوؤں کی کیا ضرورت ہے وہ تو خود اس سے گریزاں رہتی ہیں.

*میں خوشبوؤں سے گریزاں ہوں اس لیے کہ کئ*

*پرانے زخم مہکتے ہیں پرفیوم کے ساتھ*

اتنی پیاری خوش مزاج فنکارہ کبھی کبھی ڈپریشن میں آجاتی ہیں اس تعلق سے پوسٹ بھی نظر سے گزری مایوسی چھا جاتی ہے تو یوں رقم طراز ہوتی ہیں

*یہ زندگی کا سفر اب تھکا رہا ہے سو ہم*

*یہیں پہ ریل کی زنجیر کھینچ لیتے ہیں*

*دم گھٹ رہا ہے آج تو پوشاک عمر سے*

*دل ہے کہ اس لباس کے بخیے ادھیڑ دوں*

بخیے دشمنوں کے ادھیڑیں آپ سے بہت سی امیدیں وابستہ ہیں. آپ کا پہلا مجموعہ آرہا ہے. ایسے کئ مجموعے اور دیوان دیکھنے ہیں.

یہ تو سرسری funny جائزہ رہا. ساری تشریحات من گھڑت ہیں جن کا حقیقت سے کوئی تعلق نہیں. ان شاءاللہ آپ کے فکروفن پر بھی سنجیدگی سے لکھوں گا اسلئے ناچیز پر کوئی غیر قانونی یا قانونی کارروائی نہ کریں کیونکہ پاکستان بالخصوص ملتان دیکھنے کی تمنا ہے وہاں کی عدالتیں نہیں.........

Chidya ki Dawat

 انتخاب : انصاری اریب نوشاد علی

چڑیا کی دعوت

          ایک دن ننھی چڑیا نے کوّے کو کھانے پر مدعو کیا۔ ننھی چڑیا نے سارا دن کھانا تیار کرتے ہوئے گزارا ،اور جب کھانا تیار ہو گیا تو وہ اپنے مہمان کے آنے کا انتظار کرنے لگی ،کچھ وقت گزر گیا لیکن کوّا نہیں آیا۔ توننھی چڑیا نے آواز دی،’’ تم کہاں ہو کوّے؟‘‘ رات کا کھانا ٹھنڈا ہو رہا ہے!’’ میں آ رہا ہوں، میں آ رہا ہوں، کوّے نے جواب دیا۔ میں غسل کر رہا ہوں اور پھر میں اپنے سرخ جوتے پہنوں گا اور میں تمھارے گھر شاہانہ اندازکے ساتھ آؤں گا اور ہم ساتھ رات کا کھانا کھائیں گے‘‘ تو ننھی چڑیا  نے کچھ اور انتظار کیا لیکن پھر بھی کوّا نہیں آیا، آخر کار ننھی چڑیا نے دوبارہ آواز دی: "کوّے؟ کوّےتم کہاں ہو؟ رات کا کھانا ٹھنڈا ہو رہا ہے اور مجھے بہت بھوک لگ رہی ہے۔ کیا آپ میرے ساتھ میرے کچن میں شامل ہونا چا ہتےہیں اور میرے ساتھ رات کا کھانا کھائیں گے؟" کوّے نے جواب دیا، "ہاں، ہاں، میں آ رہا ہوں۔ میں ابھی اپنا کام ختم کر رہا ہوں، اور پھر میں اپنے سرخ جوتے پہنوں گا اور میں شاہانہ اندازکے ساتھ تمہارے کچن میں آؤں گا اور ہم ایک ساتھ رات کا کھانا کھائیں گے، تو ننھی چڑیا  نے مزید انتظار کیا، یہاں تک کہ اس نے سوچا۔ میں نے کافی انتظار کیا ہے۔ مجھے بھوک لگی ہے اور میں رات کا کھانا چاہتی ہوں۔' اور اس طرح ننھی چڑیا اکیلے کھانا کھانے لگی۔

          یہ  اتنا لذیذ تھا کہ اس نے برتن خالی ہونے تک سب کچھ کھا لیا۔ ’’ارے نہیں!‘‘ ننھی چڑیا نے سوچا۔ ’’کوّے کے لیے کچھ نہیں بچا ،کیونکہ میں نے یہ سب کھا لیا ہے۔’’ لالچی ننھی چڑیا بہت گھبرائی۔جب اسے معلوم ہوا کہ اس نے رات کا سارا کھانا کھا لیا ہے اور اپنے مہمان کے لیے کچھ نہیں چھوڑا ہے۔ ‘‘کیا ہوگا اگر کوّے کو آکر پتہ چلے کہ کھانے کے لیےکچھ نہیں ہے؟ اس نے خود سے سوچا، ’’ کھانا نہ ہونے کی صورت میں وہ ا س کو بھی  کھا سکتا ہے!' چنانچہ ننھی چڑیا نے برتن کو اُلٹا کرنے کا فیصلہ کیا اور جا کر اپنے آپ کو چھپنے کی جگہ تلاش کی۔

باورچی خانے میں  اچانک کوّا ٹھمک ٹھمک کر آیا۔ ننھی چڑیا ننھی چڑیا، کوّے نے آواز دی، 'میں اپنے کھانے کے لیے آیا ہوں۔ تم کہاں ہو؟" چھوٹی چڑیا اپنی چھپنے کی جگہ پر رہی، ہر وقت اپنے آپ سے سوچتی رہی، 'ارے نہیں، اب میں کیا کروں کہ میں نے  تو سارا کھانا کھا لیا ہے؟' کوّے نے کچن میں سب کچھ دیکھا، لیکن ننھی چڑیا نہ ملی ۔ اس نے ایک بار پھر پکارا، ننھی چڑیا، تم  کہاں ہوں، وہ رات کا کھانا  کہاں ہے جس کا تم نے مجھ سے وعدہ کیا تھا؟

                    کوّا جلد ہی سمجھ گیا کہ برتن خالی ہے اور رات کا کھانا نہیں ہے کیونکہ ننھی چڑیا نے سارا کھانا کھا لیا  تھا۔ کوّابہت غصے میں تھا اور اس نے چولہے کے نیچے سے ایک جلتی لکڑی اُٹھا کر  اور چیخ کر کہا، ننھی چڑیا ، ننھی چڑیا، تم جہاں بھی ہو باہر آؤ۔ ورنہ میں تمہیں اس جلتی لکڑی  سے  مار دوں گا!  ننھی چڑیا نے خوف کی ہلکی سی چیخ نکالی اور کوّے نے اسے باورچی خانے کی میز کے نیچے چھپا ہوا پایا۔ ننھی چڑیا فرار ہونا چاہتی تھی، لیکن وہ اُڑنے سے قاصر تھی کیونکہ اس کا پیٹ اس رات کے کھانے سے بھرا ہوا تھا ۔جس کا اس نے کوّےکے ساتھ مل کر کھانے  کا وعدہ کیا تھا۔ کوّے نے جلتی لکڑی  سے ننھی چڑیا کو اس کے نچلے حصے پر نہیں مارا، لیکن اس نے اسے بہت سخت آواز میں کہا: ننھی چڑیا ، ننھی چڑیا، جب تم نے یہ سب کھا لیا ہے تو تم نے مجھے کھانے پر کیوں بلایا؟ تم نے میرے لیے کچھ  کیوں نہیں چھوڑا؟ کیا تم نہیں جانتے کہ ایسی حرکت کرنا بہت بری بات ہے۔

ننھی چڑیا نے واقعی میں خود کو بہت قصوروار محسوس کیا اور اس دن سے اس نے اپنے مہمانوں کے آنے سے پہلے کبھی بھی رات کا کھانا نہیں کھایا۔ اور اس نے کبھی کوئی ایسی بات نہیں کہی جس سے کسی کا دل دُکھا ہوا۔

 (ماخذ: ورلڈ اسٹوریز)

Subscribe to my Educational YouTube channel

AreeB TLM

#Chidya Ki Dawat

Jab Hanthi Ka Sabar..........

 انتخاب : انصاری اریب نوشاد علی 

جب ہاتھی کا صبر ٹوٹ گیا۔

          ایک دفعہ کا ذکر ہے کہ جنگل میں ایک چیونٹی اور ایک ہاتھی رہتے تھے۔ ہاتھی ایک صابر اور مہربان جانور تھا ،لیکن چیونٹی اس کی دوست نہیں تھی۔ چیونٹی ہمیشہ ہاتھی کا مذاق اڑاتی رہتی، ہمیشہ اسے بتاتی کہ وہ بہت بڑا ہے، یا اس کی ناک بہت لمبی ہے۔

"تمہیں اتنی لمبی ناک کی کیا ضرورت ہے؟"

          چیونٹی نےہلکی مسکراہٹ کے ساتھ پوچھا، ’’کیا تم نہیں جانتے کہ تم اتنی لمبی ناک کے ساتھ بے وقوف لگتے ہو؟ اور تمہارے کان اتنے بڑے اور چپٹے کیوں ہیں؟ کیا تم نہیں جانتے کہ کسی جانور کو اتنے بڑے کانوں کی ضرورت نہیں؟‘‘

چھوٹی چیونٹی ہمیشہ چھیڑتی اور بدتمیزی کرتی رہتی ۔ چیونٹی نے صرف ہاتھی کو ہی نہیں چھیڑا۔ اس نے شیر کو اس کی دھاریوں اور زراف کو اس کی لمبی گردن کے بارے میں چھیڑا۔ اس نے بندر کو اس کی دُم کے بارے میں چھیڑا ،اور اس نے خوبصورت پرندے کو اس کے پروں کے بارے میں بھی چھیڑا۔ شیر اور زراف، بندر اور پرندے، ہاتھی کی طرح صبر کرنے والے نہیں تھے۔ جلد ہی وہ چیونٹی اور اس کی چھیڑ چھاڑ سے اس قدر ناراض ہوگئے کہ انہوں نے شرارتی چیونٹی کو اپنے قریب آنے سے انکار کردیا۔

’’اگر میں اس چیونٹی کو دوبارہ دیکھوں تو میں اسے کھا لوں گا!‘‘  شیر نے کہا ،

’’اگر میں اسے دوبارہ دیکھتا ہوں تو میں اسے کچل دوں گا!‘‘ زراف نے کہا،

’’اور اگر میں اسے دوبارہ دیکھوں تو میں اسے ایک بہت ہی اونچے درخت سے پھینک دوں گا!‘‘ بندر نے کہا۔

          خوبصورت پرندہ ابھی اڑ گیا اور شرارتی چھوٹی چیونٹی کے ساتھ دوبارہ کبھی کوئی تعلق رکھنے سے انکار کردیا۔ چیونٹی نے جلد ہی جنگل میں جانوروں سے دور رہنا سیکھ لیا۔ سوائے صبر دار ہاتھی کے، کیونکہ ہاتھی نے ابھی تک شرارتی چھوٹی چیونٹی کو دھمکی نہیں دی تھی۔ چیونٹی کو اندازہ نہیں تھا کہ ہاتھی واقعی کتنا مہربان ہے۔

          چیونٹی  شکر گزار ہونے کے بجائے وہ نرم د ل ہاتھی  کو تنگ کرتی رہی۔ وہ ہاتھی کے کان کے اندر چڑھ گئی اورسرگوشی کرنے لگی، ’’ہاتھی، تم اتنے بڑے اور سست کیوں ہو؟ اور تمہارے پاؤں اتنے بد صورت اور چوکور کیوں ہیں؟‘‘ ہاتھی نے سر ہلا کر شرارتی چیونٹی کو اپنے کان سے نکالنے کی کوشش کی، لیکن چیونٹی نے مضبوطی سے پکڑ لیا اورپھر بھی اپنی چھیڑ چھاڑ سے باز نہیں آئی۔ چیونٹی نے ہاتھی سے سرگوشی کی، ’’تم بہت بوڑھے ہو گئے ہو اور۔۔۔تم بہت بوجھل اور سست ہو۔ اس وقت تک ہاتھی کے ساتھ چیونٹی کی چھیڑ چھاڑ کافی حد تک ہو چکی تھی۔ اس کے بعد بالآخر اس کا صبر کا پیمانہ ٹوٹ گیا۔

’’میں سست ہو سکتا ہوں، میں بوڑھا ہو سکتا ہوں اور میرے کان بڑے چپٹے ہو سکتے ہیں، لیکن میں تیر سکتا ہوں۔‘‘

’’اور اس سے آپ کا کیا مطلب ہے؟‘‘

           ہاتھی نے کوئی جواب نہیں دیا۔ اس کے بجائے اس نے دریا کی طرف، دریا کے کنارے اور بغیر کسی لفظ کے سیدھے پانی میں ایک سست اور مستحکم مارچ شروع کیا۔

 ’’نہیں!‘‘ شرارتی ننھی چیونٹی نے پکارا۔ ’’میں تیر نہیں سکتی! میں تیر نہیں سکتی!‘‘

’’کس طرح کا جانور تیر نہیں سکتا؟" ہاتھی نے اپنے کان اٹھا کر گہرے پانی میں ڈوبتے ہی پوچھا۔ شرارتی ننھی چیونٹی کو بہتے پانی نے ہاتھی کے کان سے باہر نکالا اور پھر کبھی نظر نہ آنے والی تیز لہر پر لے گئی۔

اس دن سے لے کر آج تک جنگل کے جوان جانوروں کو سونے سے پہلے شرارتی چیونٹی کی کہانی سنائی جاتی رہی ہے تاکہ وہ دوستوں یا خاندان والوں یا اجنبیوں کو کبھی تنگ کرنا نہ سیکھیں۔

کیونکہ والدین اپنے بچوں سے کہتے ہیں،’’ہو سکتا ہے کہ تم شرارتی چھوٹی چیونٹی کی طرح دریا میں بہہ جاؤ۔‘‘

(ماخذ: ورلڈ اسٹوریز)

👇Subscribe to my Educational YouTube channel👇

                        AreeB TLM

#Jab Hanthi Ka Sabar..........

Gabbar

Gabbar

بچوں کو امتحان میں گبر سنگھ کے کردار کے بارے میں لکھنے کو کہا گیا تو ایک لڑکے نے لکھا کہ۔۔۔۔

سادہ زندگی تھی انکی،  بھیڑ  بھاڑ سے دور جنگل میں رہتے تھے۔

ایک ہی کپڑوں میں کئی کئی دن گزار دیتے تھے۔

پانی کی بچت کے لیے کبھی کبھار ہی نہاتے تھے۔

قاعدہ و اصول کے پابند ایسے تھے کہ کالیا اور اس کے ساتھیوں کو پراجیکٹ ٹھیک سے نہ کرنے پر براہ راست گولی مار دی تھی۔

رحم دلی کا تو پوچھیں مت، ٹھاکر کو قبضے میں لینے کے بعد صرف اس کا ہاتھ کاٹ کر چھوڑ دیا تھا، اگر وہ چاہتے تو اس کا گلا بھی کاٹ سکتے تھے۔

فنون لطیفہ کے دلدادہ تھے، ان کے ہیڈ کوارٹر میں ڈانس میوزک کے پروگرام چلتے تھے اور سب خوشی سے جھوم جھوم جاتے

بسنتی کو دیکھتے ہی پرکھ لیا تھا کہ وہ ایک ماہر رقاصہ ہے۔

مزاح کو سمجھنے والے تھے، کالیا اور اس کے ساتھیوں کو ہنسا ہنسا کے مارا تھا، خود بھی ٹھٹھے مار مار کے ہنستے تھے، وہ اس دور کے لافنگ بدھا تھے۔

عورت کی عزت ‏وآبرو کے حوالے سے بہت حساس بھی تھے، بسنتی کے اغوا کے بعد صرف اس کا رقص دیکھنے کی درخواست کی تھی۔

فقیری زندگی گزاری انہوں نے، ان کے آدمی صرف زندہ رہنے کے لیے خشک اناج مانگتے تھے۔کبھی بریانی یا چکن تکے کی مانگ نہیں کی۔

سب سے اہم کام جو وہ کر گئے، وہ یہ کہ جب تک زندہ رہے سماجی کارکن بنے رہے،  رات کو بچوں کو سلانے کا کام بھی کرتے تھے۔۔۔

گبر جانتے  تھے کہ عورت بہت ضدی ہوتی ہے ،اس کا مشاہدہ انھوں نے اس وقت کیا جب ۔۔۔۔۔۔۔۔

 ویرو کے لاکھ منع کرنے کے باوجود ’’ کتوں کے سامنے ‘‘ ناچتی رہی۔

☺ماخوذ☺😂😂

👇Subscribe to Our YouTube Channel

AreeB TLM

👆یہاں کلک کریں

#Naushadali19881

#AreeBTLM 

#AreeBDTP 

Bhoton Ki Shahezadi

انتخاب : انصاری اریب نوشاد علی۔

بھوتوں کی شہزادی

پچھلے زمانے میں ملک شام پر ایک بادشاہ پرویز حکومت کرتا تھا۔ اس بادشاہ کا ایک ہی بیٹا تھا شہزادہ اسد، بادشاہ نے اپنے اکلوتے بیٹے کی تعلیم و تربیت کے لئے پوری دنیا سے ہر فن اور علم کے ماہر بلوا کر رکھے ہوئے تھے۔ بادشاہ چاہتا تھا کہ اس کا بیٹا شہزادہ اسد علم اور بہادری میں پوری دنیا میں مشہور ہو جائے ۔ مگر شہزادہ اسد بڑی لاپر واہ طبیعت کا مالک تھا۔ اس کے استاد اسے جو کچھ سکھاتے وہ جلد ہی بھول جاتا۔ اس کا نتیجہ یہ ہوا کہ استادوں   کی پوری کوششوں کے باوجود شہزادہ اسد نہ ہی زیادہ علم حاصل کر سکا اور نہ ہی اسے لڑائی بھڑائی کے فن میں مہارت حاصل ہو سکی۔

بادشاہ ہر ماہ شہزادے کا امتحان لیتا اور شہزادہ اسد ہر بار امتحان میں فیل ہو جاتا جس پر بادشاہ بے حد ناراض ہوتا ۔ وہ شہزادے کو سمجھاتا کہ اسے علم سیکھنے اور لڑائی بھڑائی کا فن سیکھنے پر پوری توجہ کرنی چاہیے ،کیونکہ اس کو ملک شام کا بادشاہ   بنتا ہے۔ مگر شہزادہ ایک کان سے بادشاہ کی باتیں سنتا اور دوسرے کان سے اُڑا دیتا ۔

آخر تھک ہار کر بادشاہ نے بھی شہزادے کو سمجھانا چھوڑ دیا اور شہزادےاسد کو اس کے حال پر چھوڑ دیا ۔شہزادے اسد کو بس ایک ہی شوق تھا کہ اس کے باغ میں دنیا کے بہترین پھول موجود ہوں ۔ اس نے اپنے باغ کے لئے دنیا دینے کے ماہر ترین مالی رکھے ہوئے تھے۔ اور اس نے اپنے سپاہیوں کو پوری دنیا میں بھیج رکھا تھا کہ جہاں بھی وہ نئی قسم کا پھول دیکھیں تو ہر قیمت پر اس پھول کا پودا لے کر اس کے پاس پہنچیں۔ ہر نئے قسم کے پھول لانے والے کو بے پناہ انعام و اکرام دیتا۔ اس کا نتیجہ یہ ہوا کہ اس کے باغ میں اتنے خوبصورت پھول اکٹھے ہو گئے کہ شاید پرستان میں بھی ایسے پھول نہ پیدا ہوتے ہوں ۔ شہزادہ اسد سارا دن اس باغ میں گھومتا رہتا اور خوبصورت پھولوں کو دیکھ دیکھ کر خوش ہوتا رہتا۔ آج بھی وہ باغ میں گھومتا پھر رہا تھا کہ اسے ملک عدن سے ایک سپاہی کی آمد کی اطلاع ملی۔

اسے فوراً ہمارے حضور پیش کرو۔ شہزادہ اسد نے حکم دیا۔ اُسے معلوم تھا کہ سپاہی کوئی نیا پھول لے کر آیا ہو گا ۔ اس لئے اس کے چہرےپر خوشی کے آثار ابھر آئے تھے ۔ اس کی نظریں باغ  کے دروازے سے پر جمی ہوئی تھیں مگر جب اس نے ایک سپاہی کو خالی ہاتھ اندر آتے دیکھا تواس کے چہرے پر غصے کے آثار ابھر آئے۔ وہ تیز نظروں سے آتے ہوئےسپاہی کو گھورنے لگا۔سپاہی نے قریب آکر بڑے ادب سے شہزادے کو جھک کر سلام کیا۔ کیا بات ہے تم خالی ہاتھ آئے ہو ؟“، شہزادے نے بڑے سخت لہجےمیں اس سے مخاطب ہو کر پوچھا۔ شہزادہ حضور ! میں نئے پھولوں کی تلاش میں ملک عدن کے شمالی حصے میں گھومتا پھر رہا تھا کہ اچانک بھوتوں کی وادی میں جا نکلا یہ وادی یوں تو بڑی سر سبز اور خوبصورت ہے مگر وہاں ہر طرف بھیانک شکلوں والے بھوت رہتے ہیں جو انسان کو پکڑ کر کھا جاتے ہیں۔ سپاہی نے بڑے مودبانہ لہجے میں  تفصیل بتانی شروع کر دی ۔

مگر تم مجھے یہ کہانی کیوں سنا رہے ہو۔ ہوگی کوئی بھوت وادی مجھے یہ بتاؤ کہ کوئی نیا پھول لائے ہو یا نہیں ۔ شہزادے نے جھنجھلائے  ہوئے لہجے میں کہا ۔حضور ! وہی تو بتانے لگا ہوں۔ اس بھوتوں کی وادی میں ایک انتہائی خوبصورت باغ ہے۔ یہ باغ بھوتوں کی شہزادی کا ہے۔ اس باغ میں اس قدر نایاب اور عجیب و غریب پھول ہیں کہ جن کا آپ نے کبھی خواب میں بھی تصور نہ کیا ہو گا ۔ سپاہی نے سرجھکاتے ہوئے کہا۔

کیا کہہ رہے ہو گستاخ ؟ اس وقت دنیا میں ہمارے باغ سےزیادہ خوبصورت باغ نہیں ہو سکتا۔ تم جھوٹ بول رہے ہوا اور تمہیں اس جھوٹ کی عبرتناک سزا ملے گی ی۔ شہزادے نے انتہائی غصیلے لہجے میں کہا۔ حضور ! آپ بے شک مجھے قتل کرا دیں لیکن میں نے اپنی آنکھوں سےوہ باغ دیکھا ہے۔ آپ یقین کریں ، وہاں پر اتنے خوبصورت پھول ہیں کہ آپ بھی دیکھ کر دنگ رہ جائیں گے ۔سپاہی نے بڑے اعتماد بھرےلہجے میں جواب دیتے ہوئے کہا۔یہ بات ہے تو ہم اس باغ کے تمام پھول اپنے باغ میں لے آئیں گے۔ ہرقیمت پر ، شہزادے نے کہا۔ اچھا تم بتاؤ کہ پھر کیا ہوا ۔؟

حضور! جب میں بھوتوں کی وادی میں داخل ہوا تو بھوتوں نے مجھے پکڑ لیا اور پھر وہ مجھے اپنی شہزادی کے پاس لے گئے۔ شہزادی اس وقت اپنے باغ میں گھوم پھر رہی تھی شہزادی نے جب مجھ سے پوچھا کہ میں کون ہوں اور اس وادی میں کیسے آیا ہوں؟ تو میں نے آپ کے اور آپ کے باغ کے متعلق سب کچھ بتا دیا۔ یہ سن کر شہزادی بہت خوش ہوئی۔ چنانچہ اس نے میری جان بخش  دی اور ساتھ کہا کہ میں جا کر اپنے شہزادے کو یہ بتاؤں کہ شہزادی کے باغ کے مقابلے میں شہزا دیے کا باغ کوئی حیثیت نہیں رکھتا ،چنا نچہ میں یہاں آگیا ۔ سپاہی نےساری بات تفصیل سے بتادی۔

اوہ ! تو شہزادی نے ہمیں چیلنج کیا ہے ہم اس شہزادی کو بھی قتل کر دیں گے اور اس کے باغ کے تمام پودے اکھاڑکر یہاں لے آئیں گے ۔ یہ ہمارا فیصلہ ہے ، شہزادے نے غصے سے لال پیلا ہوتے ہوئے کہا۔ مگر حضور ! وہ بھوتوں کی شہزادی ہے اور بھوت انتہائی خطرناک مخلوق ہے اور وہ ہے حد طاقتور اور ظالم ہیں۔ سپاہی نے ڈرتے ڈرتے کہا ۔ کچھ بھی ہو، چاہے ہماری جان ہی کیوں نہ چلی جاتے ہم اپنا فیصلہ نہیں بدلیں گے۔ شہزادے نے کہا اور پھر اس نے دو گھوڑے تیار کرنے کا حکم دیا۔تمہیں ہمارے ساتھ چلنا ہوگا تاکہ تم ہمیں اس وادی تک پہنچا سکو  ۔ شہزادے نے سپاہی سے مخاطب ہو کر کہا اور سپاہی نے سرجھکا دیا۔ ظاہر ہے کہ وہ اور کر بھی کیا سکتا تھا۔ پھر شہزادہ گھوڑے پر سوار ہو کر ملک عدن کی طرف چل پڑا۔ سپاہی بھی دوسرے گھوڑے پر سوار اس کے ساتھ ساتھ تھا۔ منزلوں پر منزلیں مارتے وہ دونوں ملک عدن کی طرف بڑھتے چلے گئے ۔

آخر ایک مہینے تک مسلسل سفر کرنے کے بعد وہ ایک روزملک عدن میں داخل ہو گئے اور یہاں انہوں نے ایک سرائے میں قیام کیا تا کہ کچھ روز یہاں آرام کرنے کے بعد وہ بھوتوں کی وادی کی طرف جا سکیں۔ شہزادہ اسد کھانے سے فارغ ہو کر آرام کرنے کیلئے جیسے ہی اپنے کمرے میں پہنچا اس کا سرا چانک چکرایا اور اس نے کمرے میں موجود الماری کو پکڑ کر اپنے آپ کو سنبھالنے کی کوشش کی ،مگر بے سود۔ اس کا دماغ کسی لٹو کی طرح گھومتا چلا جا رہاتھا اور پھر وہ دھڑام سے قریبی بستر پر گر گیا ،پھر جیسے ہی وہ بستر پر گرا۔ اسے یوں محسوس ہوا کہ جیسے بستر اپنی جگہ سے اُچھلا اور پھر ہوا میں تیرنے لگا۔ کمرے کی دیواریں غائب ہو گئیں اور شہزادہ بستر سمیت بڑی تیزی سے فضا میں اُڑتا چلا گیا ۔ شہزادہ بے حس و حرکت بستر پر پڑا ہوا تھا اس کی آنکھیں کھلی ہوئی تھیں مگر وہ حرکت کرنے سے معذور تھا البتہ وہ کھلی آنکھوں کے ساتھ اردگرد کا منتظر بخوبی دیکھ رہا تھا۔

بستر فضا میں اُڑتا ہوا پہلے تو بہت زیادہ بلندی پر چلا گیا اور پھر انتہائی تیز رفتاری سے شمال کی طرف بڑھتا چلا گیا۔ شہزادہ حیران تھا کہ آخر اسکے ساتھ کیا ہو رہا ہے۔ مگر وہ بے بس تھا۔ تھوڑی دیر بعد بستر ایک جگہ رک گیا اور پھر آہستہ آہستہ نیچے اُترنے لگا۔ یہاں ہر طرف ہلکی ہلکی روشنی پھیلی ہوئی تھی۔ ایسی روشنی جیسے صبح طلوع ہونے والی ہوا ور پھر بستر زمین پر اتر کر ٹھہر گیا اور اسکے ساتھ ہی شہزادے اسد کی تمام بے حسی بھی یکدم دور ہوگئی اور وہ اُچھل کر بستر سے نیچے اُتر آیا۔وہ حیرت سے چاروں طرف دیکھ رہا تھا۔ یہ وادی انتہائی خوبصورت اور سرسبزتھی مگر وہاں نہ ہی کوئی پرندہ نظر آر ہا تھا اور نہ کوئی جانور۔

شہزادہ اسد پہلے تو ادھر اُدھر دیکھتا رہا پھر اُسے دور پانی کی چمک نظر آئی۔ یہ کوئی بہت بڑی جھیل تھی۔ شہزادہ اسد اس جھیل کی طرف بڑھتا چلا گیا۔ کافی دیر تک چلنے کے  بعدشہزادہ آخر کار جھیل کے کنارے پہنچ گیا۔ دوسرے لمحے حیرت اور اشتیاق سے اس کی آنکھیں پھٹی کی پھٹی رہ گئیں۔ اس نے جھیل میں ایک انتہائی خوبصورت کشتی کو تیرتے ہوئے دیکھا ۔ کشتی کے اوپر سونے کا بنا ہوا ایک انتہائی خوبصورت سائبان تھا جس کے نیچے ایک خوبصورت لڑکی بیٹھی پھول سونگھ رہی تھی در کشتی کو ایک سانولےرنگ کی کنیز ایک چپو کی مدد سے چلا رہی تھی ۔کشتی جھیل کی پرسکون سطح پر آہستہ آہستہ ہلکورے لیتی ہوئی آگے کی طرف بڑھتی چلی جا رہی تھی۔

شہزادہ اسد نے اتنی خوبصورت لڑ کی آج تک نہ دیکھی تھی اس لئے وہ حیرت کے مارے بُت بنا اسے مسلسل دیکھتا رہا۔ جھیل کے پیچھے وہی سر سبز وادی پھیلی ہوئی تھی اور گھنے درختوں کے جھنڈ صاف نظر آرہے تھے۔ا بھی شہزادہ اس دکشتی کو دیکھ ہی رہا تھا کہ اچانک ایک زور دار گونج کی آواز سنائی دی اور ساتھ ہی ایک خوفناک قہقہہ بھی سنائی دیا۔ دوسرے لمحے شہزادے کے حلق سے بے اختیار ایک چیخ نکل گئی کیونکہ اس نے جھیل کے پیچھے  درختوں کے گھنے جھنڈ میں ایک بھیانک شکل کو ابھرتے دیکھا۔ یہ خوفناک شکل کسی دیو کی مانند تھی۔ اس کے سر پر دو سینگ بھی تھے۔ اس بھیانک چہرے کے ساتھ ساتھ دو ہاتھ اوپر کو نکلے ہوئے تھے۔۔اس ساتھ ساتھ شہزادے کی چیخ سن کر کشتی میں بیٹھی ہوئی لڑکی یکدم چونک پڑی اور اس نے مڑ کر تیزی سے پیچھے گھنے درختوں کے جھنڈ کی طرف دیکھا اور پھر اس کی نظریں جھیل کے کنارے پر کھڑے ہوئے شہزادہ اس پر پڑیں۔ اس نے تیزی سے کشتی چلانے والی کنیز کو کہا اور کنیز پھرتی سے کشتی میں کھڑی ہوگئی اور اس نے درختوں کے جھنڈ کی طرف رخ کر کے اپنا ایک ہاتھ فضا میں لہرایا اور اسکے ہاتھ لہراتے ہی ایک بار پھر زوردار گونج پیدا ہوئی اور درختوں کے جھنڈ کے سامنے اُبھرنے والی خوفناک شکل اچانک غائب ہو گئی۔ بھیانک شکل کے غائب ہوتے ہی کنیز نے دوبارہ چیو سنبھال لیا اور پھر کشتی کو انتہائی تیزی سے چلانے لگی۔

اب کشتی کا رخ اس کنارے کی طرف تھا جدھر شہزادہ اسد کھڑا ہوا تھا۔ چند ہی لمحوں میں کشتی کنارے پر پہنچ گئی اور کشتی میں موجود لڑ کی اُٹھ کر کنارے پر آگئی ،تم ملک شام کے شہزادے اسد ہو یا لڑکی نے بڑے ترنم کے ساتھ شہزادے اسد سے مخاطب ہو کر کہا۔ ” ہاں خوبصورت لڑکی ! ہم ملک شام کے شہزادہ اسد ہیں ، مگر تم کون ہو اور مجھے کیسے جانتی ہو ؟ ، شہزادےنے حیرت بھرے لہجے میں جواب دیتے ہوئے کہا۔ ہم اس وادی کی شہزادی حسن آرا ہیں۔ ہمیں معلوم ہو گیا تھا کہ تم ملک عدن کی سرائے میں پہنچ گئے ہو۔ اس لئے ہمارے حکم پر تمہیں بستر سمیت یہاں لے آیا گیا ہے یہ شہزادی حسن آرا نے اٹھلاتے ہوئے کہا ۔ یہ کون سی وادی ہے ؟“ شہزادے نے حیرت بھرے لہجے میں خوبصورت وادی کو دیکھتے ہوئے پوچھا۔ یہ بھوتوں کی وادی کہلاتی ہے ۔ شہزادی نے مسکراتے ہوئے جواب یا۔ ارے باپ رے ، یہ بھوتوں کی وادی ہے اور تم بھوتوں کی شہزادی ہو مگر تم بے حد خوبصورت ہو جبکہ درختوں کے جھنڈ میں جو بھوت نمودار ہوا تھا وہ تو انتہائی خوفناک اور بد شکل تھا یا شہزادے نے خوفزدہ لہجے میں جواب دیا۔

ہاں ! وہ ہمارا پہرے دار بھوت تھا۔ اس نے سمجھا تھا کہ شاید تم ہمیں نقصان پہنچانے کی نیت سے یہاں آئے ہو مگر ہم نے اسے واپس بھیج دیا ہے کیونکہ ہم نے تو تمہیں خود بلوایا ہے ۔ شہزادی نے جواب دیا۔ تو کیا بھوتوں کی عورتیں تم جیسی خو بصورت شکلوں والی ہوتی ہیں۔ شہزادے نے پوچھا۔ارے نہیں بھولے شہزادے ! میں بھوت نہیں ہوں ۔ بھوتوں میں صدیوں سے رواج ہے کہ ان کا بادشاہ اور ملکہ آدم زاد ہوتے ہیں۔ میں آدم زاد ہوں۔ یہ کنیز بھی آدم زاد ہے۔ بھوتوں کی عورتیں تو بھوتوں کی طرح ہی بد شکل ہوتی ہیں شہزادی نے ہنستے ہوئے جواب دیا ۔اوہ !میں سمجھ گیا۔ ہاں شہزادی ! مجھے سپاہی نے بتایا تھا کہ تمہارے باغ میں دنیا کے خوبصورت ترین اور نایاب پھول ہیں جبکہ ہمارا دعویٰ ہے کہ ہمارے باغ سے زیادہ خوبصورت پھول دنیا میں اور کسی کے پاس نہیں ہیں؟ شہزاد ہے اسد نے کہا۔

شہزادے ! اُونٹ جب تک پہاڑ کے نیچے نہیں آتا وہ بھی اپنے آپ کو دنیا میں بلند چیز سمجھتا ہے ۔ آؤ میرے ساتھ ! میں تمہیں اپنا باغ دکھاؤں پھر تمہیں پتہ چلے گا کہ تمہارا باغ کیا حیثیت رکھتا ہے ۔ شہزادی نے بڑےفخریہ لہجے میں کہا۔شہزادی اتم نے ہمارا باغ نہیں دیکھا اس لئے ایسی باتیں کر رہی ہو ،تم ایک عام سپاہیکو باغ دکھا کر مرعوب کر سکتی ہو۔ مگر ہمیں نہیں ، شہزادہ ابھی اکڑا ہوا تھا ۔ا وہ !پہلے باغ تو دیکھ لو یا شہزادی نے ہنستے ہوئے کہا۔ اور پھر شہزادے کا بازو دیکھ کر اسے کشتی میں لے آئی اور پھر اس نے کنیز کو کشتی چلانے کا حکم دیا ۔ اور کنیز نے تیزی سے کشتی چلانی شروع کر دی ۔ تھوڑی تھو دیربعد شہزادی جھیل کے دوسرے کنارے پر پہنچ گئی اور شہزادی ، شہزادے کا ہاتھ پکڑے نیچے اتر آئی اور پھر وادی میں آگے بڑھتی چلی گئی۔

ایک پہاڑی کے قریب پہنچ کر شہزادی نے زور سے تالی بجائی۔ دوسرے لمحے پہاڑی کا ایک حصہ کسی صندوق کے ڈھکن کی طرح اوپر اٹھتا چلا گیا۔ سامنے سونے کا بنا ہواایک خوبصورت دروازہ تھا۔ دروازے کے باہر دو خوبصورت عورتیں کھڑی تھیں شہزادی کے اشارے پر عورتوں نے دروازہ کھول دیا اور پھر شہزادی، شہزادےاسد کو لئے دروازے میں داخل ہو گئی۔ یہ ایک انتہائی خوبصورت باغ تھا۔ جہاں اتنے خوبصورت پھولوں کے تختے موجود تھے کہ شہزادہ اسد کی آنکھیں حیرت سے پھٹی کی پھٹی رہ گئیں ۔ وہ خواب میں بھی نہ سوچ سکتا تھا کہ دنیا میں اس قدر خوبصورت پھول بھی ہو سکتے ہیں ۔ وہ کسی معصوم بچے کی طرح ایک ایک پھول کےقریب جاتا، اُسے آنکھیں پھاڑ کر دیکھتا ، اسے چھو کر دیکھتا۔ اور پھران کی خوشبو سونگھتا۔

شہزادی ایک جگہ کھڑی بڑی دلچسپ نظروں سے شہزادے کی حرکتیں دیکھ رہی تھی ۔ شہزادہ بچوں کی طرح دوڑ دوڑ کر ایک ایک پھول کے پاس جاتا اور اسے کافی دیر تک دیکھتا رہتا۔تقریباً ایک گھنٹے بعد شہزادہ اٹھا اور پھر وہ شہزادی کی طرف آیا۔ اور پھر جو اس دوران ایک خوبصورت کرسی پر بیٹھ چکی تھی۔ اس کے قریب ہی ایک اورخوبصورت کرسی موجود تھی ۔ واقعی شہزادی  تمہارا باغ ،دنیا میں سب سے خوبصورت ہے۔ہمارا باغ تو اس کے مقابلے میں کچھ بھی نہیں ۔ شہزادے نے بڑےشرمندہ سے لہجے میں کہا۔ اور پھر کرسی پر بیٹھ گیا۔ اب معلوم ہوا شہزادے کہ باغ کسے کہتے ہیں؟ شہزادی نے مسکراتے ہوئے کہا۔ ہاں شہزادی ! ہم اپنے دعویٰ پر شرمندہ ہیں۔

ہم خواہ مخواہ اپنے باغ پر غرور کرتے تھے۔ کاش !یہ باغ ہمارا ہوتا ۔ شہزادے نےحسرت بھری نظروں سے باغ کو دیکھتے ہوئے کہا۔ شہزادے تم نے کبھی غور کیا ہے کہ دنیا میں سب سے خوبصورت پھول کون سا ہے ؟ شہزادی نے مسکراتے ہوئے کہا۔سب سے خوبصورت پھول تمہارے باغ میں موجود ہو گا ۔شہزادی اس سے زیادہ خوبصوت پھولوں کا تو تصوربھی نہیں کیا جا سکتا ۔شہزادے نے جواب دیا ۔اور پھر شہزادی نے زور سے تالی بجائی اور اس کے تالی بجاتے ہی دو بد شکل بھوت وہاں نمودار ہو گئے ۔ "شہزادے اسد کو اس کے بستر پر پہنچا دو"۔ شہزادی نے اُٹھتےہوئے کہا۔اور بد شکل بھوتوں نے شہزادے اسد کو یوں اٹھا لیا جیسےبچے کسی کھلونے کو اٹھا لیتے ہیں۔

ارے ارے !مجھے چھوڑ دو ،شہزادے اسد نے چیختے ہوئے کہا۔ مگر بھوت بھلا کہاں اس کی بات سنتے تھے۔ وہ اسے اٹھا کر باغ سے باہر لے آئے اور پھر تھوڑی دیر بعد انہوں نے اسے زمین پر موجود اس کے بستر پر پھینک دیا۔ اور اس کے ساتھ ہی شہزادے کاجسم بے حس و حرکت ہو گیا اور بستر دوبارہ فضا میں بلند ہوتا چلا گیا ۔ تھوڑی دیر بعد جب بستر واپس نیچے اتر کر زمین پر ٹھہرا توشہزادہ اسداُ چھل کر بستر پر بیٹھ گیا۔

شہزادہ یہ دیکھ کر حیران رہ گیا کہ وہ سرائے کے اسی کمرے میں موجود تھا اور دیواریں اسی طرح صحیح و سالم تھیں ۔ کمرے کا دروازہ بھی اسی طرح اندر سے بند تھا ۔جس طرح اس نے کمرے میں داخل ہوتے وقت اسےبند کیا تھا۔شہزادہ کافی دیر تک اس واقعہ پر غور کرتا رہا کبھی تو اُسے خیال آتا کہ یہ سب کچھ خواب تھا مگر شہزادی کے باغ کا منظر جب اس کی آنکھوں کے سامنے آتا تو اُسے سب کچھ حقیقت معلوم  ہوتا۔آخر کار شہزادہ سمجھ گیا کہ یہ سب کچھ خواب نہ تھا بلکہ بھوتوں  کی شہزادی حُسن آرا کا کارنامہ تھا کہ وہ اپنی پُر اسرار طاقتوں کے ساتھ اُسے بستر سمیت اُٹھا کر لے گی اور پھر باغ دیکھا کر اسے واپس سرائے کے کمرے میں بھیج دیا۔

۔۔۔ختم شد۔۔۔

Dhokeybaaz

دھوکے باز

انتخاب:        عافیہ انصاری

ایک دفعہ ایک چالاک اور دھوکے باز شخص نے، کہیں سے ایک گدھا چوری کیا اور اسے فروخت کرنے کے لیے قریبی بازار لے گیا، بازار جانے سے پہلے اس نے گدھے کے منہ میں اشرفیاں ٹھونس کر کپڑے سے اچھی طرح بند کر دیا۔

بازار کی پر ہجوم جگہ پر کھڑے ہوکر اس نے گدھے کے منہ سے کپڑا ہٹا دیا، جیسے ہی کپڑا ہٹا گدھے کے منہ سے اشرفیاں نکل کر زمین پر گرنے لگیں، سکّوں کی چھنکار سن کر لوگ متوجہ ہوگئے، اور حیران ہوکر پوچھنے لگے کہ گدھے کے منہ سے سکے وہ بھی سونے کے ؟ یہ کیا ماجرا ہے؟

دھوکے باز کہنے لگا، بھائیو یہ ایک عجیب و غریب گدھا ہے اور میں اس سے بہت تنگ ہوں، میں جب بھی پریشان یا اُداس ہوتا ہوں تو دن میں ایک بار اس کے منہ سے سونے کی اشرفیاں گرنے لگتیں ہیں، اب تو میرے گھر میں اشرفیاں رکھنے کی جگہ بھی نہیں بچی، اس لیے میں چاہتا ہوں کہ اسے کوئی ضرورت مند اور جانوروں سے پیار کرنے والا تاجر خرید لے، لوگوں نے اشرفیاں گرتی ہوئی اپنی آنکھوں سے دیکھ لیں تھیں اور باقی کا قصہ سُن کر ہر کسی کی خواہش یہی تھی کہ یہ گدھا جتنے میں بھی مل جائے سستا ہے۔

ایک دوسرے سے بڑھ چڑھ کر بولیاں لگاتے ہوئے، آخر کار ایک بڑے تاجر نے خطیر رقم کے عوض اسے خرید لیا، فروخت کرنے والے نے، رقم اور زمین پر گرے ہوئے سکے سمیٹے اور گھر چلا گیا۔جس تاجر نے گدھا خریدا تھا، وہ فخر سے گردن اکڑائے ہوئے چل رہا تھا اور اہل قریہ اس کے پیچھے پیچھے چلتے ہوئے اس کے گھر تک پہنچ گئے، سارے لوگ مل کر اُداس اور پریشان شکلیں بنا کر گدھے کے ارد گرد بیٹھ گئے، لوگ گھنٹوں بیٹھ کر انتظار کرتے رہے اور بالآخر وہ سچ مچ پریشان ہوگئے، اس دوران گدھا جو کب سے بھوکا تھا اس نے خوب چاراکھایا مگر ایک سکہ تک نہ گرا۔ آخر وہاں سے کسی دانا کا گزر ہوا۔ اس نے بتایا کہ تمھارے ساتھ دھوکا ہوچکا ہے،  اس سے پہلے کہ فروخت کرنے والا بھاگ جائے، فوراً            اس دھوکے باز کو پکڑو۔وہ تاجر اور اہل قریہ اکٹھے ہو کر جب اس دھوکے باز کے گھر کے باہر پہنچے اور دروازہ کھٹکھٹا کر اس کے متعلق استفسار کیا تو اندر سے اس دھوکے باز کی بیوی نے کہا کہ وہ تو کہیں کام سے دوسرے گاؤں گئے ہوئے ہیں، آپ باہر ہی انتظار کریں میں اپنا پالتو کتا بھیجتی ہوں، یہ جاکر انہیں آپ کے متعلق بتائے گا اور انہیں ہر صورت ساتھ بھی لیکر آئے گا، لوگ دلچسپی سے دیکھنے اور سوچنے لگے کہ یہ کیسے ہوسکتا ہے کہ کتا اپنے مالک کو گھر لائے۔

دراصل اس چالاک شخص نے جب دیکھا کہ تمام لوگ اس کے گھر کے باہر جمع ہیں تو اس نے اپنی بیوی کو کتے والی پٹی پڑھائی، گھر میں پہلے سے بندھے ہوئے کتے کو آزاد کیا اور خود گھر کی پچھلی سمت سے چپکے سے نکل گیا، دور جاکر اس نے کتے کو پکڑ لیا اور اس کے ساتھ واپس گھر کی طرف چل دیا۔

تھوڑی دیر گزری تو لوگوں کو اپنی آنکھوں پر یقین نہیں آرہا تھا کہ وہی شخص جس نے گدھا فروخت کیا تھا، اسی کتے کے پیچھے پیچھے چلتا ہوا آرہا تھا۔ اب سارے لوگ یہ بات بھول کر کہ وہاں کیوں آئے ہیں،  کتے کے متعلق پوچھنے لگے کہ یہ کتا تو بڑے کام کا ہے، بتاؤ یہ کتنے کا ہے؟ اسے تو ہر صورت خریدنا ہوگا۔

اس دھوکے باز اور چالاک شخص نے پہلے تو انکار کیا لیکن بعد میں اچھے دام ملنے پر وہ کتا اسی ہجوم میں سے ایک دوسرے تاجر کو فروخت کردیا۔اب لوگ ٹولی کی شکل میں صرف یہ دیکھنے کے لیے کہ کتا گھر سے گئے ہوئے شخص کو کیسے واپس لے کر آتا ہے اس تاجر کے ساتھ چلتے گئے۔تاجر نے گھر جاکر غلام کو کہا کہ تم ساتھ والے گاؤں جاؤ تاکہ کتا تمھیں ڈھونڈ کر واپس لے آئے۔

غلام جیسے ہی دوسرے گاؤں پہنچا وہاں سے بھاگ نکلا اور کتا بھی کہیں دور چلا گیا جو واپس نہ آیا. جب غلام اور کتا دونوں واپس نہ آئے تو لوگوں کو پتا چل گیا کہ یہ ایک بار پھر ہمارے ساتھ دھوکا ہوگیا ہے۔وہ دوبارہ اکٹھے ہوکر جب اسی دھوکے باز کے گھر گئے تو وہ ایک بار پھر گھر کے پچھلے خفیہ دروازے سے بھاگ نکلا، اور اس کی بیوی کہنے لگی وہ ساتھ والے گاؤں کسی کام سے گئے ہوئے ہیں، لوگوں نے کہا کہ آج ہم اسکا گھر کے اندر بیٹھ کر انتظار کریں گے، اور یوں دونوں تاجروں سمیت ارد گرد کے تمام لوگ اس کے گھر میں بیٹھ گئے، کافی دیر جب گزر گئی تو وہی دھوکے باز گھر میں داخل ہوا اور وہاں بیٹھے ہوئے لوگوں کو دیکھ کر چاپلوسی سے کام لیتے ہوئے ان کے سامنے جھک جھک کر آداب بجا لانے لگا،

  بیوی سے پوچھنے لگا کہ میرے خاص مہمانوں کی تکریم میں تم نے کیا کیا؟ ان مہمانوں کو کچھ کھانے پینے کو دیا یا بھوکا ہی بٹھایا ہوا ہے؟ وہ لوگ دل ہی دل میں شرمندہ ہونے لگے کہ ہم جسے دھوکے باز سمجھ رہے ہیں وہ تو بڑا سخی اور مہمان نواز بندہ ہے، اس کی بیوی نے انکار میں سر ہلاتے ہوئے کہا کہ ان فضول اور فالتو لوگوں کو کون اپنا مہمان بناتا ہے، میں نے تو انہیں پانی تک نہیں پوچھا، یہ سن کر وہ شخص غصے میں پاگل ہوگیا اور جیب سے ایک خنجر نکال کر بیوی کے پیٹ میں گھونپ دیا، فوراً لہو بہہ نکلا اور اور اس کی بیوی لہرا کر نیچے فرش پر گر پڑی، وہاں بیٹھے ہوئے لوگ اسے برا بھلا کہنے لگے کہ ہمارے پیسوں کو تو رہنے دو لیکن ہمارے لیے اپنی بیوی کو قتل کرنا کہاں کی دانشمندی ہے، وہ چالاک اور دھوکے باز کہنے لگا، آپ لوگ فکر نہ کرو یہ ہمارا روزانہ کا کام ہے، میں اسے غصے میں آکر قتل کردیتا ہوں تو دوبارہ اس سینگ سے زندہ بھی کردیتا ہوں، یہ کہتے ہوئے اس نے دیوار پر ٹنگے ہوئے کسی جانور کے بڑے سے سینگ کی طرف اشارہ کیا، پھر وہ سینگ اتارا اور مری ہوئی بیوی کے پاس بیٹھ کر سینگ کو منہ میں دبا کر سپیروں کی طرح جھوم جھوم کر پھونک مار کر بجانے لگا، تھوڑی دیر بعد وہی مقتولہ جو کچھ دیر پہلے سب کے سامنے خنجر کے وار سے ہلاک ہوچکی تھی، اپنے زخم پر ہاتھ رکھے ہوئے اٹھ کھڑی ہوئی،

 تمام لوگ حیرت زدہ رہ گئے، اور ایک بار پھر وہ سب یہ بات بھول کر کہ یہاں کیوں آئے ہیں، اس سینگ کو خریدنے کے درپے ہوگئے، دھوکے باز نے بولی بڑھانے کی خاطر کہنا شروع کردیا کہ یہ طلسماتی سینگ پوری دنیا میں ایک ہی ہے جو صرف میرے پاس ہے اور میں اسے کسی بھی قیمت پر فروخت نہیں کروں گا، کرتے کرتے ایک بڑے تاجر نے سب سے زیادہ رقم ادا کرکے وہ سینگ خرید لیا، اور سینگ خرید کر وہ  لوگ اپنے اپنے گھروں کو چلے گئے۔

جس نے سینگ خریدا تھا، کہنے لگا، میں جو اپنی بیوی کی چخ چخ سے تنگ ہوں، آج اگر اس نے لڑائی کی تو مار دوں گا اور رات سکون سے گزار کر صبح سینگ کی مدد سے زندہ کرلوں گا، لیکن درحقیقت اس دھوکے باز نے جب اپنے گھر کے باہر لوگوں کا اکٹھ دوبارہ دیکھا تو فوراً منصوبہ بنا کر اس میں اپنی بیوی کو شامل کرلیا، لال رنگ کو ایک تھیلی میں ڈال کر بیوی کے کپڑوں میں چھپا دیا، پھر ایک خنجر لیا جس کے دستہ میں خفیہ خانہ اور ایک بٹن تھا جس کو دبانے سے خنجر کا پھل اپنے دستے میں غائب ہوجاتا تھا اور ایک پرانا بیکار سینگ لیکر دیوار پر ٹانگ دیا اور خود گھر کے خفیہ رستے سے نکل کر تھوڑی دیر روپوش رہ کر واپس آگیا، اور پھر بیوی کو زندہ کرنے کا ڈرامہ رچا کر بیکار سینگ فروخت کردیا تھا۔

جس نے سینگ خریدا تو جیسے ہی گھر پہنچا تو اس کی بیوی نے حسب معمول لڑائی شروع کردی اس نے بے فکر ہو کر خنجر نکالا اور بیوی کے پیٹ میں گھونپ دیا، خون نکلا، وہ تڑپی اور ٹھنڈی ہوگئی۔ اس نے اٹھا کر کمرے میں لٹا دیا اور پوری رات ایسے ہی رہنے دیا، صبح اٹھ کر اس نے بہتیرا سینگ کو مختلف طریقوں سے بجایا مگر وہ تو مردہ ہوچکی تھی، دھیرے دھیرے اسے اپنی بیوقوفی کا احساس ہونے لگا، وہ پچھتاوے کے احساس کے ساتھ گھر سے نکلا تو باہر تمام لوگ اس کے منتظر تھے کہ پتا کریں رات کیا بیتی اور سینگ نے کیا کمال دکھایا۔ وہ شخص دکھ اور شرمندگی کو چھپانا چاہ رہا رہا تھا مگر کچھ لوگوں نے جب اصرار کیا تو اصل بات اگلوا ہی لی۔ اب کی بار انہوں نے پکا ارادہ کر لیا کہ اس نوسرباز کی کسی بات میں نہیں آنا، اور اس کو دیکھتے ہی قابو کرکے ایک بوری میں بند کرکے سمندر برد کر دینا ہے۔

سب نے اس پر اتفاق کیا، ایک بار پھر وہ لوگ اکٹھے ہوکر اس دھوکہ باز کے گھر پہنچے اور اندر جاکر اسے قابو کرلیا، بڑی سی بوری میں ڈال کر سمندر کی طرف چل دیئے۔سمندر وہاں سے کافی دور تھا، بوری میں بند دھوکہ باز شخص کو باری باری اٹھاتے ہوئے وہ سب لوگ تھک گئے تھے، سمندر سے نصف فاصلے پر پہنچ کر انہوں نے کہا کہ تھوڑی دیر سُستا لیتے ہیں، اس کے بعد آرام سے اسے پانی میں پھینک دیں گے۔ وہ لوگ تھکے ہوئے تھے، اس لیے جیسے ہی آرام کرنے کے لیے رُکے تو انہیں نیند نے آلیا اور وہ بے فکر ہو کر سو گئے۔

بوری میں بند شخص نے بھوک اور پیاس سے بے حال ہوکر چیخنا چلانا شروع کردیا، مگر وہ تمام لوگ تو خواب خرگوش کے مزے لے رہے تھے، اسی اثناء میں وہاں سے ایک چرواہے کا گزر ہوا اس نے دیکھا کہ لوگوں کا جم غفیر آڑھا ترچھا ہوکر سو رہا ہے، اور ایک طرف پڑی بوری سے چیخنے چلانے کی آوازیں آرہی ہیں۔

اس نے بھیڑ بکریوں کو ایک طرف کھڑا کیا اور آگے بڑھ کر جب بوری کھولی تو اس نے دیکھا کہ اس کے اندر تو کوئی شخص بند ہے، چرواہے نے پوچھا کہ اے شخص !تو کون ہے؟ یہ ارد گرد سوئے ہوئے لوگ کون ہیں؟ اور تجھے بوری میں کیوں بند کیا ہوا ہے، یہ ماجرا کیا ہے؟دھوکے باز نے کہا سنو یہ تمام لوگ میرے خاندان کے ہیں، یہ میری شادی سمندر پار ایک شہزادی سے زبردستی کرانا چاہتے ہیں، مگر مجھے مال و دولت کی ذرا بھی ہوس نہیں ہے، میں تو اپنی چچا زاد لڑکی سے محبت کرتا ہوں۔ چرواہا اسکی باتیں سن کر بڑا متاثر ہوا، اور کہنے لگا بتاؤ کیا میں تمھارے کسی کام آسکتا ہوں؟ دھوکے باز کہنے لگا ہاں ہاں کیوں نہیں، تم میری جگہ اس بوری میں آجاؤ، اور جب شہزادی کے سامنے بند بوری کھلے گی تو پھر اس کا تم سے شادی کرنے کے سوا کوئی چارہ نہیں ہوگا۔چرواہا یہ سن کر خوش ہوگیا اور ہنسی خوشی اس دھوکے باز کی جگہ بوری میں بند ہوکر بیٹھ گیا۔ دھوکے باز نے وہاں سے چرواہے کی بھیڑ بکریوں کو ساتھ لیا اور واپس اپنے گھر آگیا۔

وہ لوگ جب نیند سے بیدار ہوئے تو انہوں نے بوری کو اٹھایا اور چلتے چلتے آخر کار سمندر میں پھینک دیا، اور مطمئن ہوکر اپنے اپنے گھروں کو لوٹ آئے۔اگلے دن انہوں نے دیکھا کہ دھوکے باز شخص کے گھر کے باہر تین چار سو کی تعداد میں بھیڑ بکریاں بندھی ہوئی ہیں۔ وہ بڑے حیران ہوکر جب وہاں گئے تو دیکھا کہ جس کو سمندر میں پھینک کر آئے تھے وہ تو گھر میں بیٹھا اپنی بیوی سے گپیں لڑا رہا ہے۔انہوں نے تعجب سے پوچھا کہ، ہم نے تو تمھیں کل سمندر میں پھینکا تھا، اور آج تم صحیح سلامت اپنے گھر میں ہو اور باہر بھیڑ بکریوں کا ریوڑ بھی ہے؟

وہ دھوکے باز شخص کہنے لگا، جب تم لوگوں نے مجھے سمندر میں پھینکا تو وہاں سے ایک جل پری نمودار ہوئی اور وہ مجھے اپنے ساتھ زیر سمندر بنے گھر میں لے گئی، وہاں ہیرے جواہرات اور موتیوں سے بنے ہوئے بے شمار محل اور ہزاروں کی تعداد میں مال مویشی تھے۔

جل پری نے مجھے مہمانوں کی طرح رکھا اور میری خوب خاطر مدارات کی، وہ مجھ سے شادی کرنا چاہتی تھی اور وہاں کا حاکم بنانا چاہتی تھی ، مگر جب میں نے کہا کہ میری پہلے سے ایک بیوی ہے اور میں اپنے گھر جانا چاہتا ہوں تو اس نے کہا کوئی بات نہیں اور اپنی طرف سے بھیڑ بکریوں کا تحفہ دیکر کہنے لگی کہ اگر تمھارے علاقے میں کوئی ایسا ہوا جو یہاں کی جل پریوں سے شادی کرکے یہاں عیش و عشرت کی زندگی گزارنا چاہتا ہو تو اسے یہاں لے آنا، یہ بات سننے کی دیر تھی کہ وہاں آئے ہوئے تمام بوڑھے اور جوان کہنے لگے ہم وہاں جانا چاہتے ہیں اور وہاں جاکر حاکم بننا چاہتے ہیں۔

اس دھوکے باز شخص نے کہا کہ تم تو صرف چند افراد ہو اگر اس قصبے کے تمام لوگ بھی وہاں چلے جائیں تو پھر بھی کم ہیں۔انہوں نے کہا کہ ہم قصبے کے ہر شخص کو اپنے ساتھ جانے کے لیے راضی کرلیں گے، دھوکے باز نے کہا ٹھیک ہے کل صبح کے وقت سمندر کے کنارے ہر شخص اپنے لیے ایک بوری اور ایک رسی لیکر پہنچ جائے، اور وہاں پہنچ کر ہر شخص ایک دوسرے کو بوری میں بند کرنے میں مدد کرے گا۔

اگلے روز صبح کے وقت دھوکے باز شخص نے سب کو بوری میں بند  کیا اور اپنی بیوی کی مدد سے تمام بوریوں کو سمندر میں پھینک دیا۔ اس کے بعد وہ بیوقوفوں کے قصبے کا تن تنہا مالک بن گیا۔۔۔۔۔

۔۔۔ختم شُد۔۔۔۔