Sabz MagarMach (Story)

 سبز مگر مچھ (کہانی) :

 ملک فاران میں ایک بادشاہ کنگ فو تھا ۔ اس کی کوئی اولاد نہ تھی ۔ بادشاہ نیک سیرت ، انصاف پسند اوررحم دل تھا ۔بادشاہ اولاد نہ ہونے کی وجہ سے غمزدہ رہتا تھا ۔ ایک روز دربار میں چار سپاہی داخل ہوئے انہوں نے ایک بز رگ آدمی کو پکڑ رکھا تھا ۔ بزرگ آدمی کے چہرے سے جلال ، وقار اور رعب ٹپک رہاتھا۔

یہ شخص کون ہے ؟

’’ہمیں جھوٹ بولنے کی کیا ضرورت ہے ۔‘‘  اُس نے ادب سے کہا ۔ ’’درویش جھوٹے نہیں ہوا کرتے ۔ ہم جیسے درویشیوں کی کوئی منزل نہیں ہوتی ۔ جدھر دل نے کہا اُدھر ہی چل پڑے ۔‘‘ بادشاہ نرم پڑ گیا اوراس کی آواز میں لجاجت ہو گئی ۔ اللہ کے نیک بزرگ ہو تو تم ہمارے متعلق سب کچھ جانتے ہوگے ۔

بزرگ نے اسے غور سے دیکھا اور کہا،

"بادشاہ سلامت ! ہم تمہارے متعلق سب کچھ جانتے ہیں ۔"

"کیا جانتے ہیں آپ"؟

"یہی کہ آپ بے اولاد ہیں" ؟

 بادشاہ سلامت! آپ کی قسمت میں اولاد ہے صرف ایک شہزادہ ۔ بز رگ نے کہا ۔

آپ کے ہاں ایک شہزادہ ہو گا ، مگر وہ بڑی اُلجھنوں میں گرفتار رہے گا ۔

"الجھنوں سے نکلنے کا کوئی راستہ ہے"؟

 دریائے نربدا میں ایک سبز رنگ کا مگر مچھ ہے شہزادہ جوان ہو کر وہاں جائے ۔ وہ اس مگر مچھ کو ہلاک کرے ۔ مگر مچھ کے پیٹ سے ایک ہیرا نکلے گا ۔ وہ اس ہیرے کو گلے میں ڈال لے ۔ تب اس کی الجھنیں دور ہونگی۔

بادشاہ سوچ میں پڑ گیا پھر بولا ،

"اے نیک دل بز رگ ! مگر ہمارے ہاں شہزادہ کب ہوگا ؟

ایک سال کے بعد ۔ بزرگ نے کہا ۔

" ہم کیسے یقین کرلیں کہ شہزادہ ضرور ہوگا۔"

 

یہاں سے  سومیل کے فاصلے پر ایک سفید رنگ کی پہاڑی ہے ۔ اس پہاڑی پر سیب کا ایک درخت ہے آپ ملکہ کو ساتھ لے جائیں اور اس درخت کے سیب توڑ کر کھائیں ۔

ہمیں کب جانا ہوگا ؟ بادشاہ نے پوچھا

کل چلے جائیں۔

انہوں نے سب سے پہلے خدا کے حضور سجدہ کیا اور اولاد کے لئے گڑ گڑا کر دعا مانگی پھر سیب توڑ کرکھائے اور ٹھنڈا میٹھا پانی پیا۔ کچھ دیر وہاں قیام کر کے پہاڑی سے نیچے اتر آئے ۔

محل میں آ کر وہ ہاتھی سے اترے ۔ وزیر اور مشیر ان سے رخصت لے کر چلے گئے ۔ بادشاہ اور ملکہ اپنےکمرے میں آگئے ۔ایک سال گذرنے کے بعد الله تعالے نے انہیں ایک چاند سا شہزادہ بخشا ۔ محل میں چراغاں کیا گیا ۔ غریبوں کو کھانا کھلایا گیا ۔ انعامات تقسیم کئے گئے ۔ غریبوں کی جھولیاں بھر دی گئیں ۔ پورے ملک میں جوش و خروش سے جشن منایا گیا اور اس جشن کا سلسلہ پورے ایک ماہ تک جاری رہا ۔ لوگوں نے شہزادے کے لئے درازی عمر کی دعائیں مانگیں ۔

شہزادہ کیا تھا ۔ چاند کا ٹکڑا تھا ۔ ملکہ اور بادشاہ اسے دیکھ دیکھ کے جیتے ۔ ویسے تو شہزادے کو سبنھالنے اور دیکھ بھال کرنے کے لئے لونڈیاں اور نوکرانیاں کیا کم تھیں لیکن ملکہ کو جیسے سارے جہاں کی دولت مل گئی تھی شہزادے کے سارے کام خود کرتی ، نہلاتی کپڑے بدلاتی ، وقت پر دودھ، خوراک غرض کہ ہر ضرورت کاخیال رکھتی ۔

شہزادے کی تعلیم و تربیت کے لئے بہترین اتالیق مقرر کئے گئے ۔ شہزادے کو فنون لطیفہ کے ساتھ ساتھ جنگی تربیت بھی دی جانے لگی ۔ شہزادہ پورے انہماک کے ساتھ اپنی تعلیم مکمل کرنے لگا ۔بزرگ کے کہنے کے مطابق شہزادہ کسی نہ کسی الجھن میں گرفتاررہتا تھا ۔ کئی مرتبہ شدید بیمار ہوا ۔ ایک دن کشتی رانی کرتے کرتے دریا میں گر پڑا تھا ۔ اور ایک دفعہ شکار کو گیا تو راستہ بھول گیا تھا ۔

ایک دفعہ اسے کئی جنگلی اُٹھا کر لے گئے تھے ۔ بادشاہ کی فوج جنگلیوں کو تباہ کر کے واپس لائی تھی اس لئے اب شہزادے کو باہر نہ نکلنے دیا جاتا تھا ۔ محل میں بھی اسے چوٹیں لگتی رہتی تھیں ۔ شہزادہ کسی نہ کسی الجھن میں گرفتار رہتا تھا۔

الجھنوں میں پھنسا پھنسا ہی شہزادہ جوان ہو گیا ۔ جب شہزادہ جوان ہوگیا تو بادشاہ کو خیال آیا کہ شہزادے کو اب اس کی منزل کی طرف بھیجا جائے ۔ بادشاہ نے شہزادے کو بلایا ۔ جب شہزادہ آگیا تو اسے اپنے قریب سونے کے تخت پر بٹھایا اور کہا ۔ شہزادے ! اب تم جوان ہو گئے ہو اس لئے اب تمہارافرض ہے کہ تم اس مگر مچھ کو تلاش کرو ۔

 کس مگر مچھ کو حضور ؟

بادشاہ نے اسے غور سے دیکھا

 اسی مگر مچھ کو جو تمہاری الجھنوں کا حل ہے ۔

 بادشاہ نے کہا ۔ تم ہمیشہ الجھنوں میں گرفتار رہتے ہو۔ اگر الجھنوں سے نکلنا چاہتے ہو تو دریائے نربدا کی طرف جاؤ ۔ اس دریا میں ایک سبز رنگ کا مگر مچھ ہے ۔ اس کو ہلاک کر کے اس کے پیٹ سے ہیرا نکال لاؤ۔ اور اسے گلے میں ڈال لو ؟

بہت اچھا ابا حضور!

" کیا مجھے اکیلے ہی جانا ہوگا؟ شہزادے نے پوچھا۔

اکیلے ہی جانا ہو گا ۔

شہزادے نے کوئی جواب نہ دیا ۔ اور وہ اُٹھ کر اپنے کمرے میں آ گیا ۔ اس نے اگلے دن جانے کے لئے اپنی تیاری مکمل کرلی ۔

اگلے دن وہ بادشاہ اور ملکہ سے اجازت لے کراپنے سیاہ گھوڑے پر بیٹھا اور آگے چل پڑا ۔ اُسے کچھ معلوم نہ تھا کہ دریائے نربدا کہاں ہے ۔ وہ شمال کی طرف گھوڑا بڑھانے لگا ۔ اس کے پاس کھانے پینے کا سامان کئی دنوں کے لئے کافی تھا - اس کے پاس تلوار کے علاوہ تیر کمان بھی تھی ۔ اس کا نشانہ بہترین تھا۔ وہ ایک بہترین تلوار بازی بھی تھا۔

وہ کافی طاقت و راور جوشیلا تھا ۔ وہ اکیلا دس آدمیوں کے ساتھ مقابلہ کر سکتا تھا ۔ کمان اس نے کند ھے پر لٹکا رکھی تھی ترکش بھی کندھے پر لٹکا ہوا تھا ۔ اس کے پاس کافی تعداد میں تیرتھے دہ بڑے وقاراور شان سے گھوڑے پر بیٹھا تھا ۔ گھوڑا شمال کی طرف بڑھا جارہا تھا

جب رات ہو گئی تو اس نے درخت کے قریب اپنا گھو ڑاکھڑا کیا اور وہیں بیٹھ گیا ۔ کافی دیر بیٹھا رہا۔ نیند بھی آرہی تھی لیکن محلوں میں رہنے والا شہزادہ تھا بھلابیٹھ کر یا زمین پر لیٹ کر کیسے سو سکتا تھا۔ بس ایسے ہی گھٹنوں پر سر رکھے بیٹھا تھا اُس نے کچھ دیر پہلے کھانا کھا لیا تھا اور قریب ہی بہتے ہوئے چشمے سے پانی بھی پی لیا تھا ۔

اب اس نے تلوار تیر کمان اور کھانے پینے کا سامان اپنے قریب کیا اور گھوڑے کو اسی درخت کے ساتھ باندھ دیااس نے دیکھا دُور دُور تک آبادی کا کوئی نام ونشان تک نہ تھا ۔ چاروں طرف جنگل بیابان اور سناٹا چھایا ہوا تھا ۔ وہ درخت کے نیچے بیٹھ کر رات گزارنے لگا۔ اُسے بیٹھے ہوئے ابھی زیادہ دیر نہیں گذری تھی کہ اُسے درخت پر سے پرندوں کے شور مچانے کی آواز سنائی دی ۔ وہ ایکدم اٹھ کر بیٹھ گیا اور پریشان ہوکر چاروں طرف دیکھنے لگا کہ پرندے رات کے وقت اتنا شورکیوں مچارہے ہیں ۔ شہزادے نے دیکھا کہ ایک بہت بڑا سانپ پرندوں کے گھونسلوں کی طرف بڑھ رہا ہے اور چھوٹے چھوٹے پرندے اسے دیکھ کر شور مچا رہے ہیں ۔ شہزادے نے فو راً تلوار نکالی اور سانپ کی طرف لپکا۔ سانپ نے دیکھا کہ اس پر حملہ ہو رہا ہے اس نے پھن پھیلا کر شہزادے پر حملہ کرنا چاہا ۔ جو نہی سانپ اُچھل کر آگے بڑھا۔ شہزادے نے تلوار سے اس کے دوٹکڑے کر دیئے ۔

جب اُس نے دیکھا کہ سانپ ٹھنڈا ہو گیا ہے تودوبارہ اپنی جگہ پرآ کر بیٹھ گیا ۔

پرندے اب خاموش ہو گئے تھے ۔ شہزادہ بے چین سا تھا ۔ اسی لئے اسے نیند نہیں آرہی تھی بہت دیر بعد اس کی آنکھ لگی اور وہ سو گیا۔

صبح جب وہ اُٹھا تو چاروں طرف صبح کا اجالا پھیلا ہوا تھا ۔ پرندے خدا کی حمد و ثنا میں مصروف تھے  پاس ہی سانپ مرا ہوا پڑا تھا۔ پرندے درخت پر سے اُڑ کر شہزادے کے سامنے ہیں اڑنے لگے جیسے اس کا شکریہ ادا کر رہے ہوں۔ اسی طرح انہوں نے بڑے پرندوں کو شہزادے کے کارنامے سے آگاہ کر دیا تھا ۔ وہ شہزادے کے کانامے پر بہت خوش ہوئے ، اُنہوں نے بھی شہزادے کے سامنے اُڑکر شکر یہ ادا کیا۔ پھر وہ اڑ کر دور چلے گئے جب واپس آئے تو ان کی چونچوں میں سیب تھے ۔ پرندے وہ سیب شہزادے کے آگے پھینک دیئے ۔ شہزادے نے خوش ہو کر وہ سیب کھائے ، سیب نہایت لذیزتھے۔

تھوڑی دیر بعد جب سورج نکل آیا تو اس نے اپنے سفر کی تیاری شروع کر دی ۔ کھانا کھایا ۔ چشمے کا ٹھنڈا پانی پیا۔ پرندوں نے اسے پھر سیب لا کر دیئے شہزادے نے سیب کھائے پھر وہ گھوڑے پر بیٹھ کر اپنے سفر کے لئے روانہ ہو گیا اس نے دیکھا کہ دو پرندے اس کے گھوڑے کے آگے پیچھے اُڑ رہے ہیں ۔ پرندے ایک طرف کو مڑ گئے ۔ مگر شہزادہ سیدھا جانے لگا ۔ پرندے پھر واپس پلٹ کر اس کی طرف آگئے ۔ ایک پرندے نے اسے پر مارا اور آگے آگے اڑنے لگا ۔ شہزادہ سمجھ گیا کہ پرندہ اسے دوسری طرف لے جانا چاہتا ہے ۔ اُس نے گھوڑا موڑ لیا۔

 وہ سوچنے لگا کہ پہ پرندے اُسے کہاں لے جانا چاہتے ہیں ؟ مگر پرندوں کو اس سے کیا دشمنی ہوسکتی تھی ؟ پھر اس نے سوچا کہ پرندے اس کے دل کا حال جان گئے ہیں وہ اسے ضرور دریائے نربدا کی طرف لے جانا چاہتے ہیں ۔ اس نے فیصلہ کر لیا کہ وہ پرندوں کے بتائے ہوئے راستہ پر ہی چلے گا۔

پرندے آگے آگے اُڑ رہے تھے اور وہ ان کے ساتھ ساتھ گھوڑا چلانے لگا ۔ پرندے اُسے شام تک دریائے نربدا کے کنارے لے گئے وہ دریائے نربدا دیکھ کر حیران رہ گیا۔ وہ اُس کے کنارے کھڑا ہو گیا۔ سامنے سورج غروب ہورہا تھا۔ بہت ہی شاندار نظارہ تھا۔

وہ اب سوچ رہا تھا کہ اتنے بڑے دریا میں سبز مگر مچھ کو کیسے تلاش کرے ۔ وہ اسی سوچ میں کھڑا تھا کہ ایک پرندہ تیزی سے اڑا اور لہروں کی طرف چلا گیا ۔ وہ لہروں پر پَر مارنے لگا۔ دوسرے پرندے نے بھی ایسا ہی کیا وہ لہروں پر پَر مارتے کنارے کی طرف آرہے تھے ۔

شہزادے نے دیکھا کہ سبزمگر مچھ  گھبرا یا ہوا کنارے کی طرف آرہا تھا ۔ پرندوں نے پَر مار مار کر اسے بدحواس کر دیا تھا ۔ جب مگر مجھے کنارے پر آ گیا تو شہزادے نے اس کے پیٹ میں تلوار گھونپ دی اور اس کا پیٹ چیر دیا۔ پیٹ کے پھٹتے ہی ایک ہیرا نکل کر زمین پر گر پڑا مگر مچھ تڑپنے لگا ۔ اور تڑپ تڑپ کر مر گیا ۔ شہزادے نے ہیرا اپنے قبضے میں کر لیا اور اسے ساتھ لے کر اپنے ملک آگیا۔

ختم شد

#sabz Magar Mach #Areebtlm #naushadali19881

Shah -e- Jinnat ki beti

 شاہ جنات کی بیٹی:

Shah -e- Jinnat ki beti

شاہ جنات کی بیٹی

 

ملک آسلان میں ایک تاجرنعیم نامی رہتا تھا۔ اس کی ایک ہی بیٹی تھی جس کا نام نشاط تھا۔ نیم خشک میووں کی تجارت کرتا تھا اور ملک آسلان میں وہ خشک میوں کا  سب سے بڑا تاجر کہلاتا تھا اس لئے سب لوگ اسے تاجر نعیم کی بجائے تاجرمیوہ کہتے تھے۔ چونکہ وہ تجارت کی وجہ سے بے حد امیر آدمی تھا اس لئے اس نے اپنی رہائش کے لئے شاہی محل کی طرح کا محل بنایا ہوا تھا جس میں وہ اپنی بیٹی نشاط اور ملازموں کے ساتھ رہتا تھا۔ تاجر میوہ کی بیوی کافی عرصہ پہلے فوت ہوگئی تھی لیکن تاجر میوہ نے اپنی بیٹی نشاط کی وجہ سے دوسری شادی نہ کی تھی۔ وہ اپنی بیٹی سے بے حد محبت کرتا تھا اور اس کے آرام کے لئے بڑی بڑی رقمیں خرچ کرنے سے بھی نہ کتراتا تھا۔ یہی وجہ تھی کہ نشاط گو ایک تاجر کی بیٹی تھی لیکن وہ شہزادیوں کی طرح عیش و آرام سے رہتی تھی۔ کام کاج کرنے کیلئے اس کے پاس نوکروں اور نوکرانیوں کی ایک پوری فوج تھی جو اس کا حکم بجالانے کے لئے ہر وقت حرکت میں رہتی تھی۔ نشاط کی ایک سہیلی ارم تھی جس کا باپ پہلے تو ایک غریب مزدور تھالیکن پھردیکھتے ہی دیکھتے اس کے پاس اتنی دولت آگئی کہ اس نے ایک شاندار محل نما مکان بنوایا۔ اور ارم کے ساتھ اس محل میں عیش وعشرت سے رہنے لگا۔ وہ اب کو ئی کام نہ کرتا تھا۔ سارا دن محل میں پڑا رہتا لیکن نہ جانے اس کے پاس کہاں سے اتنی دولت آ گئی تھی کہ بے تحاشہ خرچ کرنیکے باوجود اس کی دولت میں ذرہ برابر بھی کمی نہ آتی تھی ۔ ارم اور نشاط چونکہ ایک دوسرے کے ہمسایہ میں رہتی تھیں اور ہم عمر تھیں اس لئے ان دونوں میں بے حد گہری دوستی تھی۔ نشاط کو ارم سے معلوم ہوا تھا کہ اس کے باپ کو ایک عامل نے ایسا منتر بتایا ہے جس کی مدد سے اس نے خوفناک قسم کے جنوں اور دیوتوں کو اپنے قبضہ میں کر لیا ہے اور یہی دیو اورجن اُسے دنیا بھر سے دولت اور ہیرے جواہرات لاکر دیتے ہیں اور اسی وجہ سے وہ کوئی کام کئے بغیر عیش وعشرت سے زندگی گزار رہے ہیں۔ ارم سے یہ باتیں سُن کر نشاط کو بھی شوق پیدا ہوا کہ وہ بھی جنوں اور دیوؤں کو اپنے قبضے میں رکھے۔ گوارم نے اسے اس ارادے سے باز رہنے پر بے حد اصرار کیا کیونکہ اس کے کہنے کے مطابق یہ انتہائی کٹھن کام ہے اور اس میں جان جانے کا بھی خطرہ ہے لیکن نشاط فطری طور پر بے حد ضدی لڑکی تھی۔ اس لئے اس نے فیصلہ کر لیا تھا کہ وہ ہر قیمت پر جنوں اور دیوتوں کو اپنے قبضے میں رکھے گی اور پھر ساری عمر عیش و عشرت سے گزارے گی۔ ارم کے باپ سے بھی اس نے یہ بات کی لیکن اس نے اسے سختی سے جھڑک دیا تھا البتہ وہ ارم کے ذریعے یہ معلوم کر لینے میں کامیاب ہو گئی تھی کہ ارم کے باپ کو جس عامل نے یہ منتر بتایا تھاوہ نزدیک ہی پہاڑیوں میں رہتا ہے اور بے حد بوڑھا آدمی ہے۔ ایک بار وہ سخت بیمار تھا اور مرنے کے قریب تھا۔ کہ ارم کا باپ جو قریب ہی مزدوری کر رہا تھا وہاں گیا اور اس نے از راہ ہمدردی  اس بوڑھے کو نہ صرف پانی پلایا بلکہ اس کی مدد کرتے ہوئے اسے اپنے کاندھے پر اٹھا کر اس کی غار تک بھی پہنچا دیا۔ اس پروہ بوڑھا عامل بے حد خوش ہوا اور اس نے اس خوشی میں ارم کے باپ کو وہ منتر بتا دیا تھا جس کی وجہ سے آج ارم اور اس کا باپ دونوں عیش و عشرت سے زندگی بسر کر رہے تھے۔ نشاط کا باپ تاجر میوہ کسی قافلے کے ساتھ تجارت کی غرض سے دوسرے ملک گیا ہوا تھا اس لئے نشاط آزاد تھی ۔اسے معلوم تھا کہ اس کا باپ کم از کم دو تین ماہ بعد واپس آئے گا اور اس دوران وہ اطمینان سے جنوں اور دیوؤں کو قابو کرنے کا منتر بھی سیکھ لے گی اورا نہیں قابو میں بھی کر لے گی ۔ آج اس نے اس بوڑھے عامل سے ملاقات کا فیصلہ کیا ہوا تھا اس لئے صبح ناشتہ کرنے کے بعد اس نے اپنا گھوڑا اصطبل سے نکالا اور اکیلی ہی ان پہاڑیوں کی طرف چل پڑی جہاں وہ بوڑھا عامل رہتا تھا۔ ایک گھنٹے تک گھوڑا بھگانے کے بعد وہ ان پہاڑیوں کے دامن میں پہنچ گئی۔ پہاڑیاں بالکل ویران اور بنجر تھیں یہاں ایک درخت اور پودا تک نہ تھا۔ دھوپ بھی بے حد سخت تھی اس لئے یہاں تک پہنچتے پہنچتے نشاط پسینے میں ڈوب سی گئی اور اسے اپنا لباس بے حد بھاری بھاری سالگنے لگا۔ لیکن وہ چونکہ اپنی دھن کی پکی تھی اس لئےا س نے گرمی کی پرواہ کئے بغیر گھوڑا وہیں پہاڑیوں کے دامن میں چھوڑا کر پیدل چلتی ہوئی پہاڑیوں پر چڑھنے لگی لیکن تھوڑا اوپر چڑھنے کے بعد بُری طرح ہانپنے لگی۔ یہاں کوئی سایہ بھی نہ تھا جس کے نیچے بیٹھ کر وہ آرام کرتی۔اس لئے ہانپنے اور تھک جانے کے باوجود وہ ہونٹ بھینچے اور بڑھتی گئی اور پھر کچھ دیر بعد اسے دور ایک غار میں سے دھواں سا نکلتا دکھائی دیا تو وہ سمجھ گئی کہ اس غار میں وہ بوڑھا عامل رہتا ہے۔ غار کا پتہ چل جانے سے اس کی ساری تھکاوٹ دُور ہوگئی اور وہ زیادہ جوش سے اس غار کی طرف بڑھتی چلی گئی۔ غار کے سامنے پہنچ کر وہ رُک گئی غار بہت کھلا اور اندر تک چلا گیا تھا غار کا دہانہ کھلا تھا اور اندر آگ جلنے کی وجہ سے روشنی تھی۔ نشاط اس غار کے اندر داخل ہوگئی لیکن ابھی اس نے دو تین قدم ہی اٹھائے ہوں گے کہ یکلخت ایک طرف سے سیاہ رنگ کا ایک سانپ پھنکارتا ہوا نکلا اور نشاط پر حملہ آور ہو گیا۔ نشاط کے منہ سے ڈر کے مارے چیخ نکل گئی۔ وہ پیچھے ہٹنے کی وجہ سے غار کے دہانے پر ہی ایک دھماکے سے گرگئی اور وہ سیاہ سانپ پھنکارتا ہوا اس کے سینے پر چڑھ گیا لیکن اس سے پہلے کہ وہ اسے کاٹتا اچانک غار کے اندر سے ایک بوڑھا آدمی نمودار ہوا اور اس نے ایک ہاتھ سے اس خوفناک سانپ کو گردن سے پکڑ کر غار سے باہراچھال دیا۔ اٹھو ۔ اٹھو۔ کون ہو تم ۔ڈرو نہیں۔ میں نے سانپ کو بھگا دیا ہے۔ اس بوڑھے نے زمین پر خون کے مارے نیم بے ہوش پڑی نشاط سے مخاطب ہو کر کہا۔ ”بب بب بہت شکریہ جناب، نشاط نے خوفزدہ لہجے میں غار سے باہر اس جگہ کو دیکھتے ہوئے کہا جہاں وہ خوفناک سانپ جاکر گرا تھالیکن جب وہاں اسے سانپ نظرنہ آیا تو اس کی قدرے تسلی ہوگئی اور وہ اٹھ بیٹھی۔ بوڑھا اُسے تسلی دیتا ہوا غار کے اندر لے گیا۔ وہاں ایک طرف آگ جل رہی تھی جس پر ایک ہنڈیا چڑھی ہوئی تھی۔ دوسری طرف ایک میلا کچیلا اور پُرا نا سابستر پڑا ہوا تھا باقی غار خالی تھا۔ ایک طرف پانی کا بھرا ہوا گھڑا اور گلاس بھی موجود تھا۔ بوڑھے نے پانی کا گلاس بھر کر نشاط کو دیا جو نشاط غٹاغٹ پی گئی ۔ پانی پینے سے اس کا تیزی سے دھڑکتا ہوا دل اپنی جگہ پر آیا تو اس کے ہوش پوری طرح ٹھکانے آگئے۔

 بیٹھو بیٹی اور یہ بتاؤ کہ اس قدر دھوپ اور گرمی میں تم اکیلی ان پہاڑیوں میں کیا کرتی پھر رہی ہوں، بوڑھے نے غور سے نشاط کو دیکھتے ہوئے کہا۔ نشاط و ہیں فرش پر اطمینان سے بیٹھ گئی ” میں آپ سے ملنے آئی ہوں بزرگ با با نشاط نے جواب دیا تو بوڑھا عامل چونک پڑا ” مجھ سے ملنے ، کیوں ، بوڑھے نے اس کےسامنے زمین پر بیٹھتے ہوئے کہا۔ ” میں وہ منتر جاننا چاہتی ہوں میں جس سے دیوؤں اور جینوں کو قابو میں کیا جاسکتا ہے۔ نشاط نے جواب دیا۔ ” کیا کہہ رہی ہو تم۔ دیوؤں درجنوں کو قابو کرنے کا منتر میں تو نہیں جانتا ایسا منتر یہ بوڑھے نے منہ بناتے ہوئے کہا۔ آپ مجھ سے نہیں چھپا سکتے بزرگ بابا مجھے معلوم ہے کہ آپ نے میری سہیلی ارم کے باپ ناصرکو یہ منتر بتایا ہے۔ اور اب وہ دیوؤں اور جنوں کو قابو کر کے عیش کر رہا ہے ۔ نشاط نے مسکراتے ہوئے کہا ” اوہ !تو کیا ناصر نے تمہیں میرا پتہ بتایا ہے“ بوڑھے کے لہجے میں اس بار ہلکا ساغصہ شامل تھا۔”ارے نہیں بابا میں نے ان سے بات کی تو انہوں نے مجھے بےحد سختی سے جھڑک دیا تھا۔ میں نے اپنی سہیلی ارم کے ذریعے کسی طرح معلوم کر لیا ہے کہ ارم کے باپ ناصر کو پتہ بھی نہیں چل سکا ۔نشاط نے جواب دیا اور بوڑھے کے چہرے پر چھا جانے والا غصہ دُور ہوگیا۔ ہو ں۔۔۔ تو یہ بات ہے ۔ بوڑھے نے کہا اور پھر اس نے آنکھیں بندکرلیں اور منہ ہی منہ میں کچھ پڑھنے لگا۔ نشاط خاموش بیٹھی اسے دیکھتی رہی۔ تھوڑی دیر بعد بوڑھے بابا نے آنکھیں کھولیں اور نشاط سے مخاطب ہوا۔ " تو تم تاجر میوہ کی بیٹی نشاط ہو۔ میں نے معلوم کر لیا ہے کہ تم ضد کی بہت پکی ہو اس لئے آسانی سے باز نہ آؤگی لیکن بات یہ ہے کہ دیووں اور جینوں کو قابو کرنا تو ایک طرف ایک دیویا ایک جن کو پکڑنے کے لئے بہت محنت کرنی پڑتی ہے اور پھر تمہاری جان کو بھی شدید خطرہ ہوگا کیونکہ تم ایک سانپ سے اس قدر ڈرگئی تھیں اس لئے بہتر یہی ہے کہ تم یہ خیال دل سے نکال دو تمہارے پاس دولت اور عیش وعشرت کی کوئی کمی نہیں ہے تمہیں آخر کیا ضرورت ہے؟ کسی دیو یا جن کو قابو کرنے کی ۔ بوڑھے عامل نے انتہائی سنجیدہ لہجے میں کہا۔ ” آپ ایک جن یا دیو کی بات نہ کریں، بزرگ بابا میں تو پوری دنیا کے جینوں اور دیوؤں کی ملکہ بننا چاہتی ہوں۔ نشاط نے کہا اور بوڑھا عامل اس کی بات سن کر بے اختیار قہقہہ مار کر ہنس پڑا۔ پھر تو تمہیں شاہ جنات کو قابو کر نا پڑے گا۔ وہ اگر قابو آ گیا تو پوری دنیا کے جن اور دیو خود بخود قابو میں آجائیں گے۔ بوڑھے عامل نے ہنستے ہوئے کہا۔ " اوہ واقعی مجھے تو اس کا خیال ہی نہ آیا تھا ، ٹھیک ہے آپ مجھے شاہ جنات کو قابوکر نے کا منتر بتادیں تاکہ وہ فوراً میرے قابو میں آجائے ، نشاط نے خوش ہوتے ہوئے کہا۔ تو تمہارا کیا خیال ہے کہ ادھر تم منتر پڑھو گی ادھر شاہ جنات تمہارے سامنے ہاتھ باندھ کر آکر کھڑا ہو جائے گا ۔بوڑھے نے حیران ہوتے ہوئے کہا۔ ”تو مجھے اور کیا کرنا پڑے گا ۔ نشاط اسطرح حیران ہو کر بولی جیسے واقعی اس کا خیال یہی ہو کہ بس اسے منتر کا پتہ چل جائے تو پھر جینوں ، دیوؤں کو قابوکرنا تو کوئی مشکل ہی نہ ہوگا۔ سنو میں نے دیکھ لیا ہے کہ اب تم کسی صورت میں باز نہ آؤ گی اس لئے میں تمہیں شاہ جنات کو قابو کرنے کا عمل ہی بتا دیتا ہوں۔ شاہ جنات بڑا رحم دل ہے۔ ہو سکتا ہے اگر تم اس پر قابو نہ پا سکو تو وہ تم پر رحم کھاتے ہوئے تمہیں معاف کردے ور نہ دوسرے جن اور دیوتو اس قدر ظالم ہوتے ہیں کہ تم سے ذرا سی غلطی ہوئی تو وہ ایک لمحے میں تمہاری بوٹیاں اڑا دیں گے ، بوڑھے عامل نے ایسے لہجے میں کہا جیسے وہ اب نشاط سے جان چھڑانا چاہتا ہو ” میں کوئی غلطی نہ کروں گی آپ بس مجھے منتر بتا دیں ۔ نشاط نے بڑے با اعتماد لہجے میں کہا۔ اچھا سنو تم لڑکی ہو اس لئے میں تمہیں آسان منتربتادیا ہوں ورنہ ناصر نے تو اندھے کنویں میں دس روز تک بغیر کچھ کھائے پیئے الٹا لٹک کر منتر پڑھا تھا تب جاکر وہ اپنے مقصد میں کامیاب ہوا تھا۔ تم  ایسا کرو کہ اپنے مکان کے ایسے کمرے کا انتخاب کرو جس کے ایک طرف کھلا بر آمدہ سا ہوجس میں سے آسمان صاف دکھائی دے ۔ ایک زردرنگ کا بڑا سا صندوق تم اس کمرے میں رکھوا دو ا ور باقی سارا سامانکلوا لینا۔ البتہ بر آمدہ کے سامنے اگر کوئی پردہ ہو تو اسے اچھی طرح باندھ دینا پھرتم سبز رنگ کا ایسا چست لباس پہننا ہے کہ جس پر سرخ رنگے  کے پھول بنے ہوئے ہوں ۔کمر پر سنہرے رنگ کا کمربند باندھ لینا۔ اپنے بال کھلے چھوڑ دینا بائیں ہاتھ میں خالص سونے کی چوڑیاں، کانوں میں خالص سونے کے بُندے، گلے میں خالص سونے کا لاکٹ اور سر پر مانگ کے درمیان خالص سونے کا بناہوا جھومر ساپہن لینا۔کیونکہ شاہ جنات کو خالص سونے اور سبز رنگ اور سرخ پھولوں والا لباس بے حد پسند ہے۔ پھر آدھی رات کے وقت جبکہ آسمان پر سیاہ بادل چھائے ہوئے ہوں اور کوئی تارہ نظر نہ آرہا ہو اس صندوق پر بیٹھ کر برآمدے کی طرف منہ کر کے تم کومنتر پڑھتے رہنا ہے بغیرکسی تعداد کے مسلسل پڑھتے رہتا ہے کسی بھی وقت شاہ جنات آسمان سے اتر کر تمہارے پاس آجائے گا۔ اس کی نشانی یہ ہے کہ اس کے جسم ،چہرے ،سرا ور بالوں کا رنگ سُرخ ہوگا آنکھیں زرد رنگ کی ہوں گی اور اس کے سر کے دونوں طرف ہلکے زرد رنگ کے باہر کی طرف نکلے ہوئے سینگ ہوں گے اور اس کی خاص نشانی یہ ہے کہ اسکے سامنے کے دو چھوٹے دانتوں کے درمیان ایک لمبا خنجر نما دانت ہوگا۔ اس کے ناخن بڑے بڑے ہوں گے ۔ وہ نمودار ہوتے ہی انتہائی خوفناک آوازیں نکال کر تمہیں ڈرائے گا اگر تم نے ڈر کریہ منتر پڑھنا چھوڑ دیا تو پھر شاہ جنات بھی تمہارے قابو سے باہرہوگا اور چاہے تو تمہیں مار ڈالے اور چاہے تو تمہیں معاف کردے لیکن اگر تم خوفزدہ نہ ہوئیں اور مسلسل منتر پڑھتی رہیں تو پھرشاہ جنات تمہاری منتیں شروع کر دے گا کہ تم اسے قابو میں نہ کرو لیکن تم کو اس وقت تک منتر پڑھتے رہنا ہے جب تک شاہ جنات خود اقرار نہ کرے کہ وہ اب تمہارے قابو میں آچکا ہے جب وہ اقرارکرلے تو تم صندوق کا ڈھکنا کھول دینا شاہ جنات اس صندوق میں گھُس جائے گا۔ تم اس کا ڈھکنا بند کردینا۔ یہ اس بات کی علامت ہوگی کہ وہ اب ہمیشہ کے لئے تمہارے قبضے میں آ گیا ہے ۔ چند لمحوں بعد صندوق کا ڈھکن کھول دینا اور شاہ جنات باہر آکر تمہارے سامنے ہاتھ باندھ کر کھڑا ہو جائے گا۔ اس طرح تم کامیاب ہو جاؤ گی اور شاہ جنات تمہارا غلام بن جائے گا اور چونکہ وہ جنات کا بادشاہ ہے اس لئے دنیا کے تمام جن ، دیو اور پریاں سب پر تمہارا حکم چلے گا۔ بوڑھے عامل نے کہا   اور ساتھ ہی اس نے اسے ایک منتر بھی نہ صرف بتایا بلکہ بار بار پڑھوا کر اسے اچھی طرح یاد کرا دیا" بہت بہت شکریہ بزرگ بابا! آپ کا یہ احسان میں ساری زندگی نہ بھولوں گی۔ نشاط نے انتہائی جوش بھرے لہجے میں کہا بس ڈر نامت ،چاہے وہ شاہ جنات تمہیں کتنا ہی کیوں نہ ڈرائے ۔بوڑھے عامل نے سر ہلاتے ہوئے کہا۔

 وہ کسی شیر چیتے کے روپ میں تو نہ بدل جائے گا۔ نشاط نے ایک خیال کے آتے ہی پوچھا۔

 

”ارے نہیں وہ شاہ جنات ہے عام جن نہیں ہے اور شاہ جنات کو حکم نہیں ہے کہ وہ اپنے آپ کو بدل سکیں وہ خالی تمہیں ڈرائے گا روپ نہ بدل سکے گا۔ بوڑھے عامل نے کہا۔ اور نشاط کو اب پوری تسلی ہوگئی چنانچہ وہ اٹھی اور بوڑھے عامل کا ایک بار پھر شکریہ ادا کر کے خوش خوش غار سے نکلی اور دوڑتی ہوئی پہاڑی سے نیچے اتر آئی اس کا گھوڑا کا کافی دُور ایک درخت کے سائے میں کھڑا تھا۔ نشاط کو دیکھتے ہی وہ زور سے ہنہنایا اور دوڑتا ہوا اس کے قریب آگیا ۔ نشاط نے اسکی گردن پر پیار سے تھپکی دی اور پھرگھوڑے پر سوار ہوکر واپس اپنے مکان میں پہنچ گئی مکان میں پہنچ کر اس نے سارے کمروں کا بغور جائزہ لیا اور پھر ایک کمرہ اسے بالکل اسی طرح کا مل گیا جیسا اسے بوڑھے عامل نے بتایا تھا اس کے سامنے کھلا برآمدہ تھا اور آسمان صاف نظر آرہا تھا۔ ایک بہت بڑ اصندوق بھی اسے نظر آ گیا جس میں سردیوں کے لحاف رکھے جاتے تھے اس نے ملازموں کو بلوا کر اس کمرے کا سارا سامان اٹھوا دیا اور صندوق خالی کراکر اس نے وہیں کمرے میں رکھوا دیا پھر ایک ملازم سے کہہ کر اس نے صندوق پر زردرنگ کرالیا۔ اس کے ساتھ ہی کمرے میں موجو د نیلے رنگ کےپردے کو اس نے بندھوا دیا۔ اس کے بعد وہ اپنے اس کمرے میں گئی جہاں اس کے لباس موجود تھے اسے یاد تھا کہ اس کے پاس سبنر رنگ کا ایسا لباس موجود ہے جس میں سرخ رنگ کے پھول بنے ہوئے ہیں۔ کچھ عرصہ پہلے اس نے بڑے شوق سے یہ لباس بنوایا تھالیکن یہ قدرے تنگ سلا تھا اس لئے اسے اس قدر تنگ لباس پہن کر الجھن ہوتی تھی اس لئے اس نے اسے پہنے بغیر ہی رکھوا دیا۔ اب چونکہ بوڑھے عامل نے کہا تھا کہ لباس چست ہونا چاہئے اس لئے اب وہ اسے پہن سکتی تھی تھوڑی سی تلاش کے بعد اسے لباس مل گیا سنہرے رنگ کا کمربند تو پہلے ہی سے اس کے پاس موجود تھا۔ زیورات کی بھی اس کے پاس کمی نہ تھی اس لئے اب وہ شاہ جنات کامنتر پڑھنے کے لئے پوری طرح تیار ہو چکی تھی لیکن ایک شرط ایسی تھی جس پر اس کا زور نہ چل سکتا تھا کہ آسمان پر سیاہ رنگ کے بادل چھائے ہوئے  ہوں اور کوئی تارا آسمان پر نظر نہ آئے لیکن آسمان پر گہرے بادل تو ایک طرف بادل کا ایک ٹکڑا نہ تھا اس لئے اب نشاط کو انتظار کرنا تھا اور یہ انتظار سے بے حد گراں لگ رہا تھا لیکن رات ہونے سے پہلے ہی وہ یہ دیکھ کر خوشی سے اُچھل پڑی کہ آسمان پر سیاہ رنگ کے بادل اکٹھے ہونے شروع ہو گئے۔ اب نشاط کو اپنی کامیابی کا اوربھی یقین ہوگیا کہ قدرت بھی اس کی مدد کر رہی ہے ۔ آدھی رات تک واقعی آسمان پراس قدر گہرے سیاہ بادل چھا گئے کہ پورا آسمان سیاہ چادر کی طرح نظر آنے لگا جس میں ایک تارہ بھی موجود نہ تھا۔ آدھی رات سے پہلے ہی نشاط نے غسل کیا اور اپنے لیے بھورے بالوں کو اس نے باندھنے کی بجائے پشت پر کھلا چھوڑ دیا سبز رنگ کا لباس پہنا جودا قعی اس کے جسم پر بیحد تنگ سا تھا گوا سے ایسا لباس پہنتے ہوئے الجھن محسوس ہورہی تھی لیکن شاہ جنات کو قابو کرنے کے شوق میں اس نے اس لباس کو گوارا کر لیا کمر بند باندھ کر اور بوڑھے عامل کے کہنے کے مطابق زیورات پہن کر وہ پوری طرح تیار ہو کر آدھی رات کو اس کمرے میں پہنچ گئی صندوق پر ٹانگیں لٹکا کر اور کھلے آسمان کی طرف منہ کر کے وہ بیٹھ گئی اور اس کے بعد اس نے جلدی جلدی وہ  منتر پڑھنا شروع کر دیا جو بوڑھے عامل نے اسے بتایا تھا منتر چونکہ اسے پوری طرح یاد تھا اس لئے وہ مسلسل اسے پڑھے جارہی تھی لیکن کافی دیر تک مسلسل پڑھنے کے باوجود نہ ہی شاہ جنات آیا اور نہ ہی کوئی اور چیز اسے نظر آئی بس سامنے سیاہ چادر کی طرح آسمان ہی نظر آرہا تھا لیکن اس نے ہمت نہ ہاری اور مسلسل منتر پڑھتی رہی کافی دیر بعد اچانک ہلکا سادھماکہ ساہوااور نشاط نے چونک کر دیکھا تو بائیں ہاتھ پرا سے برآمدے کی دوسری طرف ایک عجیب غریب سی چیز نظر آئی یہ ایک بھورے رنگ کا کھمباسا تھا جو نیچے سے چوڑا اور اوپر سے پتلا تھا اور اوپر سرے پر جا کر وہ اس طرح بن گیا تھا جیسے کسی انسان کی تھوڑی آگے کو بڑھی ہوئی ہو اور چہرے والا حصہ پیچھے کو ہٹا ہوا ہو۔ اس کے آخری سرے پر باریک کو ناسا تھا جس کے اوپر دونوں طرف چھتری کی طرح کالے اور سرخ رنگ کے ملے جلے بال سے بکھرے ہوئے تھے لیکن یہ بالوں والا عجیب ساکھمبا بے حس وحرکت اپنی جگہ پر کھڑا تھا۔ نشاط اسے دیکھ کر ذرا بھی خوفزدہ نہ ہوئی اور

ا سے دیکھتی بھی رہی اور مسلسل منتر پڑھتی بھی رہی۔ اسے منتر پڑھتے پڑھتے کچھ دیر اورگزری تھی کہ یکلخت آسمان پر سرخ رنگ کی تیز روشنی ہوئی اور اس کے ساتھ ہی آسمان پر خوفناک گڑگڑاہٹ کی آواز ابھری اور پھریہ روشنی تیزی سے اس برآمدے کی طرف آنے لگی جہاں صندوق پر بیٹھی نشاط منتر پڑھنے میں مصروف تھی یہ روشنی نشاط کے بالکل سامنے کی طرف سے آرہی تھی روشنی کچھ فاصلے پر آکر رک گئی اس کے ساتھ ہی ایسی آواز یں سنائی دیں جیسے ہزاروں شیرمل کر دھاڑے ہوں اور پھر پلک جھپکنے میں سرخ روشنی کی جگہ شاہ جنات نمودار ہو گیا وہ بالکل اسی طرح کا تھا جیسا کہ بوڑھے عامل نے بتایا تھا سُرخ رنگ کازردآنکھوں والا اور اسکے کھلے منہ میں دو چھوٹے دانتوں کے درمیان ایک لمبا خنجرنما دانت اور اسکے ہلکے زردرنگ کے باہرکو نکلے ہوئے خوفناک سینگ بھی نظر آرہے تھے نمو دار ہوتے ہی شاہ جنات نے خوفناک انداز میں چیخ ماری۔ بڑے بڑے ناخنوں والے دونوں ہاتھ موڑ کر وہ تیزی سے نشاط پر جھپٹا اسکی چیخ اور انداز اس قدر خوفناک تھا کہ نشاط منتر وغیرہ بھول کرانتہائی خوفزدہ ہوگئی اور اس نے بے اختیار دونوں ہاتھ اس طرح شاہ جنات کی طرف بڑھائے جیسے اسے ہاتھوں سے روکنا چاہتی ہو اسی لمحے شاہ جنات نے ایک اور چیخ ماری اور نشاط اس قدر خوفزدہ ہوگئی کہ بے ہوش ہوکر اس صندوق پر گرگئی جب اس کی آنکھیں کھلیں تو اس نے دیکھا کہ وہ اپنے مکان کے کمرے کی بجائے ایک ایسے بڑے کمرے میں بستر پر پڑی ہوتی ہے جس کی دیواروں کے ساتھ ہر طرف انسانی کھوپڑیاں لٹکی ہوئی تھیں۔ بستر کے ساتھ دو انتہائی بدصورت انسان کھڑے ہوتے تھے ان کے جسموں پر سفید لباس تھا اور وہ دونوں ہاتھ باندھے اور سر جھکائے خاموش کھڑے تھے لیکن وہ اتنے بدصورت تھے کہ جیسے ہی نشاط کی نظریں ان پر پڑیں وہ دہشت سے بری طرح چیختی ہوئی اٹھ کر بیٹھ گئی لیکن اس کے چیختے ہی وہ دونوں بدصورت آدمی یکانت غائب ہو گئے اور نشاط کو قدرےتسلی ہوگئی لیکن دیواروں سے لٹکی ہوئی انسانی کھوپڑیوں نے اسے اور زیادہ دہشت زدہ کر دیا۔ اوہ کاش میں اس چکر میں نہ پڑتی۔ کاش میں ایسی حماقت نہ کرتی ۔ نشاط نے بری طرح روتے ہوئے کہا۔ اسے یقین ہوگیا تھا کہ اب شاہ جنات اسے مارڈالے گا اور اسکی کھوپڑی کو بھی اسی طرح کسی دیوار کے ساتھ لٹکا دی جائے گی۔ وہ اس قدر خوفزدہ ہوگئی کہ بے اختیار ہچکیاں لے لے کر رونے لگی۔ اسی لمحے اس کمرے کا بڑ اسا دروازہ کھلا اور شاہ جنات اندر داخل ہوا۔ وہ عام دیوؤں سے بھی بڑے قد کا تھا۔ ہا ہا ہا ۔ تم نادان لڑکی ہمیں قابو میں کرنا چاہتی تھی، ہمیں شاہ جنات کو ، اب ہم تمہیں اس کی عبرتناک سزا دیں گے ۔ شاہ جنات نے اندر داخل ہوتے ہی انتہائی غصیلے اور کڑک دار لہجے میں کہا۔ نشاط کوا ور تو کچھ نہ سوجھا وہ جلدی سے بستر سے اتری اور شاہ جنات کے بڑے بڑے پیروں سے چمٹ گئی۔ شاہ جنات اتنابڑا تھا کہ نشاط کا پورا جسم اس کے پیر کے ایک انگوٹھے کے برابر تھا مجھے معاف کر دو ، شاہ بنات مجھے معاف کر دو میں نادان اور احمق لڑکی ہوں تم شاہ جنات ہومجھ پر رحم کھاؤ اور مجھے معاف کر دو نشاط نے بری طرح ہچکیاں لے لے کر روتے ہوئے کہا۔ شاہ جنات نے ہاتھ بڑھا کر اسے گردن سے پکڑا اور واپس بستر پر اس طرح اُچھال دیا جیسے کوئی بچہ کسی چھوٹے سے تنکے کو اٹھا کر پھینکتا ہے " تم واقعی نادان اور احمق لڑ کی ہو،ہمیں تم پر رحم آگیا ہے ورنہ تمہیں انتہائی عبرتناک سزا دینے کیلئے یہاں لے آئے تھے۔ بہر حال ہم نے تمہیں معاف کر دیا ہے لیکن خبردار آئندہ اس قسم کا خیال بھی کبھی دل میں نہ لانا شاہ جنات نے اس بار نرم لہجے میں کہا اور بُری طرح روتی ہوئی نشاط کو ایسے محسوس ہوا جیسے وہ مرکر دوبارہ زندہ ہوئی ہو۔ اس نے شاہ جنات کے سامنے ہاتھ باندھ دیئے اور رو رو کر اس کا شکریہ اداکرنے لگی ۔ تمہارا نام نشاط ہے ۔ شاہ جنات نے مسکراتے ہوئے کہا اور نشاط نے ہاں میں سرہلادیا۔ تم مجھے یہ بتاو کہ آخر تم مجھے کیوں قابومیں کرنا چاہتی تھیں ۔ آج تک بڑے سے بڑے عامل نے یہ جرات نہیں کی کہ وہ شاہ جنات کو قابو میں کر سکے اور تم ایک کمزور اور احمق لڑکی ہو کر ایسا کر بیٹھی، اس کی کیا وجہ ہے، چھوٹے اور حقیر جنوں کو تو یہ عامل تسخیر کرتے رہتے ہیں لیکن شاہ جنات کو قابو میں کرنا ایسا تو کبھی کسی نے سوچا بھی نہ تھا۔

 شاہ جنات کے لہجے میں حیرت تھی اور نشاط نے اسےسچ سچ  ساری بات بتادی کہ کس طرح اسے ارم کے باپ ناصر کے متعلق سُن کر جنات کی تسخیر کا شوق پیدا ہوا اور وہ اس بوڑھے عامل کے پاس گئی اور اس نے تمہاری تسخیر کا منتر اُسے بتایا ۔ " ہوں تو اس بوڑھے عامل نے واقعی تم پر رحم کھایا ہے اسے معلوم ہے کہ ہم رحمدل ہیں ورنہ جس طرح تم نے ضد کی تھی اگر وہ کسی اور جن کو قابوکرنے کا منتر بتادیتا تو دہ جن لازما ًتمہاری گردن مروڑ دیتا۔ بہرحال ٹھیک ہے تم میری بیٹی جیسی ہو۔ وہ بھی تمہاری طرح معصوم اور احمق تھا اس لئے میں نے تمہیں معاف بھی کر دیا ہے اور نہ صرف معاف کر دیا ہے بلکہ اپنی بیٹی بھی بنا لیا ہے آج سے تم شاہ جنات کی بیٹی ہو اور تمہارا مقصد بھی حل ہو گیا ہے دنیا کے تمام جن اور دیوشاہ جنات کی بیٹی کے غلام ہیں تم جو کہوگی پورا ہو جائے گا۔ لیکن دیکھنا کسی کو تنگ کرنے کے لئے کبھی جنوں کو حکم نہ دینا یہ بات شاہ جنات کی بیٹی کے وقار کے خلاف ہے کہ وہ کسی کو تنگ کرے ، شاہ جنات نے اپنا بڑا سا ہاتھ آہستہ سے نشاط کے سر پر رکھتے ہوئے کہا اور نشاط اس بار خوشی سے چیختی ہوئی بستر سے اتری اور دوبارہ شاہ جنات کے پیر کے انگوٹھے سے لپٹ گئی اور شکر یہ ادا کرنے لگی ۔ ” میری بیٹی تمہاری عمر میں اچانک مرگئی تھی اسے جینوں کی ایک خاص بیماری ہوگئی تھی اس لئے میں نے تمہیں اپنی بیٹی بنالیا ہے لیکن چونکہ آدم زاد ہو اس لئے تم یہاں میرے محل میں نہ آسکتی ہو، البتہ میں تم سے ملنے ضرور آیا کروں گا اب آنکھیں بند کرلو۔ شاہ جنات نے پیار بھرے لہجے میں کہا اور نشاط نے آنکھیں بند کر لیں پھر شاہ جنات کی آواز سنائی دی وہ اُ سے آنکھیں کھولنے کے لئے کہہ رہا تھا۔ نشاط نے آنکھیں کھولیں تو وہ اپنے مکان میں اپنے کمرے کے بستر پر بیٹھی ہوئی تھی۔ پھر تو واقعی ایسا ہونے لگا کہ وہ جو خواہش بھی کرتی پلک جھپکنے میں پوری ہو جاتی اور اب نشاط پہلے سے زیادہ خوش تھی وہ واقعی شاہ جنات کی بیٹی بن گئی تھی اور پوری دنیا کے جن اور دیو اس کے غلام بن گئے تھے ۔ بوڑھا عامل بھی ایک روز اس سے ملنے آیا اور اسے شاہ جنات کی بیٹی بن جانے پر مبارکباد دی۔ نشاط نے بوڑھے عامل کی خوب آؤ بھگت کی اور اس کا شکریہ ادا کیا۔اب وہ خوش تھی بے حد خوش کیونکہ اس کے دل کی مراد پوری ہوگئی تھی ۔ اور وہ شاہ جنات کی بیٹی بن کر ایک لحاظ سے پوری دنیا کے جنوں اور دیوں کی ملکہ بن گئی تھی لیکن اس نے ہمیشہ اپنے وعدے کا خیال رکھا کسی انسان کو تنگ کرنے کے بارے میں کبھی سوچا بھی نہ بلکہ ہمیشہ اس نے انسانوں کی مدد ہی کی۔ اس لئے شاہ جنات بھی اس سے خوش تھا اور کبھی کبھار وہ اس سے ملنے آجاتا تھا۔

 

ختم شد

Teen Ganjey aur Naie (Urdu Story )

 تین گنجے اور نائی:

 

پرانے زمانے کی بات ہے کسی گاؤں میں ایک نائی، ایک پینٹراور ایک گنجا سا تھ ساتھ رہتے تھے ۔گلی کے موڑ پرنائی کی دکان تھی  پینٹر اور گنجاسارا دن وہیں بیٹھے رہتے۔ پینٹر نے اپنے رنگ اور برش بھی اس کی دکان کے ایک کونے میں رکھے ہوئے تھے۔

نائی اپنے کام میں بالکل اناڑی تھا۔ لوگ اس سے حجامت بنو اتے ہوئے ڈرتے تھے۔ اگر کوئی بھولا بھٹکا حجامت بنوانے آجاتا تھا تو اس کی واقعی حجامت بن جاتی تھی ۔ سر سے جگہ جگہ سے خون بہہ نکلتا اور گالوں پر بھی ٹِک لگ جاتے۔ یہی وجہ تھی کہ لوگ اس سے دُور بھاگتے تھے۔

پینٹر کا حال اس سے بھی بُرا تھا۔ اسے تو رنگ کرنا آتا ہی نہیں تھا۔ کبھی کوئی گاہک پھنستا تو اس کے بور ڈ یا اشتہار کا ستیاناس مار دیتا۔ اس لئے وہ بھی اکثر بے کار ہی رہتا تھا ۔

رہ گیا گنجا۔ تو وہ صرف محنت مزدوری کرتا تھا۔ وہ اپنے گنجے سر پر بڑے بڑے بوجھ اٹھاتا اور پھیرہ پہنچانے کے بعد پھرنائی کی دکان پر آکربیٹھ جاتا۔ لوگ یہیں سے اسے مزدوری کے لئے بلاتے تھے۔ وہ بھی اپناٹوکرہ نائی کی دکان میں رکھتا تھا اور سچ پوچھئے تو، نائی اور پینٹر کی گذر اوقات بھی اسی کی وجہ سے ہو رہی تھی ۔ اگر وہ مزدوری نہ کر تا تو دہ دونوں اور ان کی بیویاں بھوکوں مر جاتے۔

تینوں کی بیویاں ان تینوں سے تنگ تھیں۔ نائی اور پینٹر کی بیویاں تو اس لئے تنگ تھیں کہ ان کے شوہر نکھٹو تھے کچھ کما کر نہیں دیتے تھے اور گنجے کی بیوی اُس سےاِس لئے تنگ تھی کہ وہ جو کچھ کماتا اس کے تین حصّے کر دیتا تھا۔ ایک خو د ر کھتا اور دو حصے نائی اور پینٹرکو دے دیتا۔ پڑوسی تو تھے ہی۔ ان کی بیویاں بھی آپس میں مل بیٹھتی تھیں۔ جب بھی وہ اکٹھی ہو تیں اپنے اپنے میاں کی بُرائی کرتیں۔

ایک دن ایک فوجی جوان، قسمت کا مارا نائی کی دکان پر حجامت کرانے آ گیا۔ اس وقت گنجا اور پینٹر بھی وہیں موجود تھے۔ نائی نے ایک زور دار گاہک کو اپنی دکان کی طرف آتے دیکھا تو اس نے ان دونوں کو خاموش ہو جانے کا اشارہ کیا۔ فوجی شاید اس گاؤں کا نہیں تھا ورنہ وہ نائی کی دکان کا رُخ کیوں کرتا۔‘‘کیوں میاں۔ یہ نائی کی ہی دکان ہے نا ؟’’  فوجی نے اندر آنے کے بعدحیران ہو کر پوچھا ۔

’’ اورتمہیں کسی کباڑیے کی دکان نظر آتی ہے یہ۔‘‘ نائی نے بُرامان کر کہا۔

’’میرا مطلب یہ نہیں تھا۔ در اصل یہاں رنگ اور برش وغیرہ بھی تو پڑے ہیں اور ایک طرف ایک ٹوکرا بھی رکھا ہے ؟‘‘

’’اوہ ۔ یہ ۔ در اصل بات یہ ہے کہ یہ دکان صرف نائی کی ہی نہیں ہے بلکہ ایک پینٹر اور ایک مزدور کی بھی ہے ۔ تم کہو تمہیں حجامت بنوا نی ہے یاپینٹری کرائی ہے یا پھر مز دور چاہئے ۔ ‘‘

’’ بھئی واہ ۔ اس کا مطلب یہ ہوا کہ یہ دکان ایک پنتھ تین کاج کاکام دیتی ہے۔‘‘  فوجی بولا۔

 آپ ٹھیک سمجھے۔ گنجے نے خوش ہو کر کہا ۔

"اچھا تو پہلے تو تم میری حجامت بناؤ، پھر میری شیوکرنا تمہارے ہاں نہانے کا انتظام تو ہو گا نہیں: فوجی بولا "

جی نہیں ۔ گاؤں کے لوگ کنویں پر نہاتے ہیں ۔ وہ کھلی ہوا میں نہانے کے عادی ہیں “ نائی نے جواب دیا ۔

 " ٹھیک ہے، ٹھیک ہے۔ میں سمجھتا ہوں ۔ ہاں تو میں کہہ رہا تھا، پہلے بال کا ٹو، پھر شیو بناؤ۔ اس کے بعد میں گنجے کو اپنے ساتھ لے جاؤں گا ۔

" کیا! مجھے لے جاؤ گے۔ کہاں۔ اور کس لئے۔

" در اصل میں ایک فوجی ہوں؟

کیا کہا۔ فوجی ہو ۔ تینوں تھر تھر کا نپنے لگے۔

" ہاں۔"

 تت ..... تو ..... تم مجھے کہاں لے جاؤ گے ، گنجے نے گھبرا کر کہا۔

 "اسٹیشن پر میرا صندوق پڑا ہے وہ اٹھا کر یہاں لانا ہو گا۔ پھر میں اس صندوق پر رنگ کراؤں گا ۔"

تینوں خوش ہو گئے۔ اتنازیادہ شاندار گاہک اس دکان میں کبھی نہیں آیا تھا جو بیک وقت تینوں کو کام دے دیتا لیکن نائی خوش ہونے کے باوجود ڈر رہا تھا کہ کہیں فوجی کے کوئی ٹک نہ لگ جائے۔ اس نے لرزتے ہاتھوں سے بال کاٹنے شروع کئے۔ فوجی آنکھیں بند کر کے بیٹھ گیا۔ اچانک قینچی کی نوک فوجی کی کھوپڑی سے ٹکرائی۔ وہ چونک اٹھا۔

" یہ کیا ہوا تھا ۔" اس نے پوچھا۔

"جی ۔ میرا ہا تھ ہل گیا تھا۔ قینچی لگ گئی تھی"۔

"خون تو نہیں نکلا "۔ فوجی نے گھبرا کر کہا ۔

 " جی ۔ جی نہیں خون نہیں نکلا"۔ نانی نے کہا۔ حالانکہ میاں فوجی کی کھوپڑی سے خون تیزی سے نکل رہا تھا۔ وہ اب پھر آنکھیں بند کر کے بیٹھ گیا۔ شاید اسے نیند آرہی تھی۔ پھر شاید اس کی آنکھ ہی لگ گئی کیونکہ اس کے بعد بھی اس کے سر پر تین زخم لگے مگر اس نے آنکھ نہ کھولی۔ اب شیو کی باری آئی۔ نائی نے صابن لگایا اور احتیا ط سے استرا چلانے لگا اچانک استراگال کی ہڈی سے ٹکرایا اور خون جاری ہو گیا۔ اس نے جھٹ وہاں روٹی کا پھا ہا رکھ دیا۔ اس سے پہلے وہ سر پر بھی تین پھاہے رکھ چکا تھا۔ جب تک شیو مکمل ہوئی چار جگہ زخم اور آچکے تھے ۔ چوتھا زخم تو کچھ زیادہ ہی بڑا آیا تھا۔ اس سے فوجی کی آنکھ کھل گئی۔ اس نے چونک کر آئینے میں دیکھا کچھ دیر تک حیران ہو کر دیکھتا رہا۔

 

" یہ میرا سر ہے یا کپاس اور چقندر کا کھیت ہے معلوم ہوتا ہےایک ہی کھیت میں کپاس اور چقند ر بو دیئے گئے ہیں۔ یہ تم نے حجامت بنائی ہے" ۔ اس نے غصیلے لہجے میں کہا ۔ جی ۔ جی ہاں ۔ حجامت ہی تو بنائی ہے ، نائی نے بمشکل کیا ۔

" ہاں ! حجامت تو تم نے واقعی بنادی میری ۔ خیر میں سمجھوں گاتم سے پہلے میں گنجے کو لے کر اپنا صندوق لے آؤں، خبر دار! یہاں سے بھاگنے کی کوشش نہ کرنا، ورنہ میں تمہارے اس گنجے کی کھوپڑی میں سوراخ کر دوں گا "۔ اس نے اس قدر خوفناک لہجے میں کہاکر تینوں  کانپنے لگے ۔ چلو گے ۔ میرے ساتھ "۔ چچ ..... چچ.... گنجے کے منہ سے نکلا ۔

" یہ چچ چچ  کیا کر رہے ہو۔ کس بات پر افسوس کر رہے ہو۔ چلو " ۔۔۔۔۔۔

چچ۔۔۔ چلئے۔ اور تم دونوں بھا گنے کی کوشش نہ کرنا ورنہ میں بے موت مر جاؤں گا ۔ گنجالرز تا کانپتا فوجی کے ساتھ چل پڑا۔ دونوں بُت بنے دکان میں بیٹھے رہ گئے۔

صندوق کا فی وزنی تھا۔ گنجے نے اسے سر پر اٹھایا تو اسے یوں لگا جیسے سر پلپلا ہو جائے گا اور بھیجا باہر نکل آتے گا۔ اس کی گر دن ادھر ادھر ہو نے لگی ۔یہ دیکھ کر فوجی بولا ،"تم عجیب مزدور ہو۔ ذرا سا صندوق بھی نہیں اٹھایا جارہا ہے۔ "

"یہ ذرا سا ہے۔ میں نے اپنی زندگی میں اس سے بڑا صندوق آج تک نہیں اٹھایا"۔

"اچھا، اچھا، باتیں نہ بناؤ سیدھے نائی کی دکان کی طرف چلو ادھر ہی کو جارہا ہوں۔ اس نائی کے بچے کی وجہ سے ہی تو اس مصیبت میں پھنسا ہوں ۔

"کیا کہا۔ میں مصیبت ہوں"، فوجی نے چلا کر کہا۔

نن نہیں .... نہیں۔ میں نے تمہیں نہیں اس صندوق کو کہا ہے۔

کیا فوجی حلق پھاڑ کر بولا ۔

" تم میرے صندوق کو مصیبت کہہ رہے ہو۔ "

تو کیا صندوق کو مصیبت کہنے میں بھی کوئی حرج ہے ، گنجاگھبراگیا

" اب تو ،نائی کے ساتھ میں تمہیں بھی سزا دوں گا وہ بھی ایسی کہ ساری زندگی یاد ہی کروگے"۔

 "مر گئے ۔ ارے بابا مجھ سے غلطی ہوگئی، تمہارا صندوق مصیبت نہیں ہے۔ یہ تو پھولوں سے زیادہ ہلکا ہے ۔ واہ۔ میں نے اس سے ہلکا صندوق آج تک نہیں اٹھایا کتنی نرم اور صاف لکڑی کا بنا ہواہےیہ۔"

" کیا بکتے ہو۔ یہ لکڑی کا صندوق ہے" ، فوجی نے آنکھیں نکالیں

ارے ۔ تو پھر؟ گنجے  کی سٹی گم ہو گئی ۔

" احمق ۔ یہ تو لوہے کا ہے "۔

" اوہ۔ تبھی اتنا ہلکا ہے" ۔ گنجے نے کہا۔

 "یہ ہلکا ہے ! " فوجی حیران ہو کر بولا۔

ہاں ، بالکل، شاید اندر سے خالی ہے !

 " ارے! کیا واقعی یہ بالکل ہلکا ہے"۔

" جی ہاں ۔ بہت ہلکا ہے۔ ایک کا غذ جتنا ، گنجے نے اس ڈر سےکہا کہ اگر صندوق کو بھاری بتا دیا تو شامت آ جائے گی ۔ "

" ارے نہیں اسٹیشن والوں نے اس میں سے میرا سامان تو نہیں نکال لیا۔ ٹھہرو! ا سے نیچے رکھ دو۔ میں کھول کر دیکھ لوں گنجے نے بڑی مشکل سے صندوق نیچے رکھ دیا۔ فوجی نے اسے کھول کر دیکھا، تمام چیز میں جوں کی توں موجود تھیں۔

" یہ تمہارا باپ خالی ہے۔ "

 جی میرا باپ ۔ وہ تو کب کا مر چکا ہے ۔

بکواس نہ کرو  فوجی چلایا ۔

" تمہیں اس جھوٹ پر زیادہ سخت سزا دوں گا ۔ اسی طرح باتیں کر تے ہوئے وہ نائی کی دکان میں داخل ہوئے۔ نائی اور پینٹر وہاں ابھی تک تھر تھر کانپ رہے تھے۔

ارے باپ رے ۔ مرگیا۔

نائی نے آگے بڑھ کر صندوق نیچے رکھوایا۔ گنجا سر پکڑ کر بیٹھ گیا۔ فوجی نے انہیں گھورتے ہوئے کہا ۔

" تم دونوں سے میں بعد میں سمجھوں گا، پہلے اس صندوق پر رنگ کر والوں ۔" ہاں تو میاں پینٹر اس صندوق پر سرخ رنگ کر دو"

بب ..... بہت اچھا...." پینٹر کا نپتے ہوئے بولا۔ ا ورصندوق پر رنگ کرنے لگا ۔

فوجی تھوڑی دیر تک تو پینٹر کو گھورتا رہا پھر چلا کر بولا ۔

" یہ تم نے رنگ کیا ہے" ۔

 جج .... جی .... ہاں ۔

" یہ کیسا رنگ کیا ہے ؟ میں نے تو تم سے کہا تھا کہ ایسارنگ کرنا کہ تم نے زندگی میں نہ کیا ہو"۔

" خدا کی قسم۔ میں نے اپنی زندگی میں کبھی ایسا رنگ نہیں کیا ۔ پینٹر کے منہ سے نکلا۔ اور نائی اور گنجے کی خوف کے با وجو د ہنسی نکل گئی ۔

کھی .. کھی ... کھی .. کھی .....

 "اچھا ۔ تمہارے بھی دانت نکلنے لگے۔ تم تینوں ہی بالکل  نکمے ثابت ہوئے ہو ۔ یہ کہتے ہوئے فوجی نے بندوق کندھے سے اُتار کر ان کی طرف تان لی۔

. مم .... مرگئے ....

 بب .... بچاؤ ... . وہ گڑگڑاتے ہوئے کہنے لگے۔ انکا  رنگ اُڑ گیا۔

" ہم پر رحم کرو ؟"

تم پر رحم کیا جا سکتا ہے لیکن ایک شرط پر۔" فوجی نے کہا ۔

یہ سُن  کر تینوں کی جان میں جان آئی۔ " ایک کیا ، سوشرطیں بتاؤ۔ ہم ماننے کو تیار ہیں۔" گنجا بولا ۔

تم تینوں کو اسی وقت میرے ساتھ شکار پر چلنا ہو گا ۔ "

ارے بس ! بھلا یہ کیا مشکل بات ہے ۔ نائی بو لا تینوں فوجی کی بات سن کر خوش ہو گئے۔

" تو کیا تمہیں یہ شرط منظور ہے۔"

" بالکل ! لیکن کھانے پینے کا بند وبست تمہیں کر نا ہو گا۔ ہم تو بھوکے ننگے ہیں ، نائی نے جلدی سے کہا۔

"فکر نہ کر و ۔ میرے تھیلے میں کھانے پینے کی بہت سی چیز میں ہیں۔ "

"لیکن ہم اپنی گھر والیوں کو تو اطلاع دے دیں۔ وہ رات بھرہمارا انتظار کرتی رہیں گی ۔ "

" تم میں سے ایک جاکر انہیں بتا سکتا ہے۔ " میں جانا چاہتا ہوں ۔ نائی نے کہا۔

 نہیں۔ میں جاتا ہوں ۔ گنجے نے کہا۔

تم دونوں یہیں ٹھہرو میں جا کہ انہیں بتا تا ہوں۔ پینٹر بولا ۔

" تم تو لڑنے لگے چلو میں اس کا فیصلہ کئے دیتا ہوں ۔" گنجا توپہلے ہی تھکا ہوا ہے۔ پینٹرا بھی ابھی رنگ کر کے ہٹا ہے۔ اس لئے نائی صاحب ہو آئیں، لیکن یادر ہے ۔ پندرہ منٹ سے زیادہ نہیں لگنے چاہیں۔ سمجھے ۔ جج ... جی سمجھ گیا۔ نائی نے کہا اور گھر کی طرف دوڑنے لگا ٹھیک پندرہ منٹ بعد وہ واپس آ گیا ۔

" بس اب چلو، اور ہاں، تم اپنے اپنے ہتھیار لے لو۔"

" ہتھیار ۔ کیا مطلب ہمارے پاس تو کوئی ہتھیار نہیں ہے۔ " تم اپنے استرے قینچیاں لے لو۔ تم رنگ کے ڈبے اور برش لے لو اور تم اپنا ٹو کرا ۔

مگر شکار کے لئے ان چیزوں کی کیا ضرورت ہے ؟ نائی نے حیران ہو کہا۔

" ضرورت ہے۔ شکار کا تجربہ تم تینوں کو نہیں مجھے ہے چلو ان چیزوں کوساتھ لے چلو" اور اس صندوق کو ۔

" یہ بھی ہمارے ساتھ چلے گا ۔ فوجی بولا ۔ لیکن اسے اٹھائے گا کون ؟ گنجے نے گھبرا کر کہا ۔

" تم تینوں باری باری اٹھاؤ گے "

 مر گئے پھر تو ۔ ہمارا کچومر نکل جائے گا ۔ نائی بولا ۔

" تو پھر یہیں گولیاں کھا کر سو جاؤ۔ فوجی نے دھمکی دی ۔"

نہیں نہیں۔ یہ نہیں ہو سکتا ۔

" تو پھر چلو۔ صندوق سب سے پہلے پینٹر اُ ٹھائے گا۔ پینٹر نے۔ صندوق اپنے سر پر اُٹھایا تو اسے یوں لگا جیسے کسی نے اس کے سر پر پہاڑی ٹکا دیاہو۔

نائی نے  اس کا اور اپنا سامان اُٹھالیا اور گنجے نے اپنا ٹوکرا۔ دکان سے با ہر نکلتے ہی فوجی نے پوچھا تم نے یہ تو پوچھا ہی نہیں کہ ہم کس چیز کا شکار کھیلتے جارہے ہیں ؟ " ارے ہاں یہ پوچھنا تو ہم بھول ہی گئے ۔ نائی کے منہ سے نکلا ؟ خیراب بتا دو۔ پینٹر مشکل سے کہا۔ اس کی گردن ادھر سے اُدھر ہو رہی تھی ۔" بتا دوں ؟" شکاری فوجی عجیب سے انداز میں پوچھا۔ ہاں ہاں۔ ضرور بتائیں  ۔۔۔ یہ گنجا بولا۔ ہم شیر کا شکار کھیلنے جارہے ہیں ۔

کیا... تینوں بری طرح چیخے اور پینٹر کے سر سے صندوق زمین پر گر گیا۔ اسی طرح گرتے پڑتے، صندوق بدلتے، فوجی کو دل ہی دل میں گالیاں دیتے وہ شیروں کے جنگل کے پاس پہنچ گئے۔ اس وقت سورج غروب ہو نیوالا تھا۔اسلئے انہوں نے فیصلہ کیا کہ رات کو آرام کیا جائے اور صبح ہونے پر شیروں کے جنگل میں  جائے تاکہ کوئی شیر سوتے میں ان پر حملہ نہ کر دے ۔ دوسرے جانوروں کے ڈر سے انہوں نے باری باری جاگنے کا پروگرام بنایا ۔ سب سے پہلے فوجی کے جاگنے کی باری طے ہوئی اور وہ تینوں اطمینان کی سانس لے کر لیٹ گئے۔ انہوں نے گھاس پھوس کے بستر تیار کر لئے تھے۔ ایک چو تھائی رات گزرنے پر فوجی نے نائی کو جگایا اور خودسوگیا۔ نائی کو بندوق تو چلائی آتی نہیں تھی۔ وہ ہاتھ میں استرالیکر بیٹھ گیا۔ پھر اٹھ کر ٹہلنے لگا۔ اس طرح بھی وقت نہ گزرا تو اسے وقت گزارنے کی ایک انوکھی ترکیب سوجھی۔ اس نے اسرا کھولا اور پینٹر کے سر پر پھیرناشروع کردیا۔ پینٹر تھکا ماندہ تھا، گہری نیند سو رہا تھا اس لئے اس کی آنکھ نہ کھلی یہاں تک کہ نائی نے اس کا سارا سرمونڈ ڈالا ۔ اس کو بھی نیند آنے لگی تھی ۔ اس لیے نیند کی جھونک میں پینٹر کا سرمونڈ تے مونڈتے اس کا ہاتھ فوجی کے سر تک جا پہنچا وہ سمجھا ابھی پینٹر کا سر پوری طرح نہیں منڈا ہے، اس لئے اس نے فوجی کا بھی سارا سرمونڈ دیا ۔ اب چونکہ باری بھی پینٹر کی تھی اس لئے نائی فوجی کا کندھا پکڑ کر ہلانے لگا ۔ کیونکہ وہ ابھی ابھی اس کا سرمونڈ کر ہٹا تھا اور اس کے خیال میں وہ پینٹر تھا ۔ فوجی کی آنکھ کھل گئی ،اس نے طیش میں آکر کہا کیا بات ہے تم نے مجھے کیوں جگا دیا۔ کیوں کیا اب تمہاری باری نہیں ہے ؟ "ابے میں فوجی ہوں ، پینٹرنہیں ہوں ۔  ارے۔ ہائیں ۔ وہ بوکھلا گیا۔ اس کی نظر یں فوجی کے منڈےہوئے سر پر جمی تھیں اور اسے معلوم ہو گیا تھا کہ اس نے پینٹر کے ساتھ ساتھ فوجی کی بھی حجامت بنا دی ہے۔ وہ خوف سے لرز نے لگا لیکن اتنی دیر میں فوجی دوباره سو چکا تھا یہ دیکھ کر اس کی جان میں جان آئی اور اس نے پینٹر کو جگایا۔ پینٹر نے ایک زور دا رانگڑائی لی۔ اس کا ہاتھ اپنے سرسے ٹکرایا تو بول اٹھا: ارے تم نے تو گنجے کو جگا دیا ہے ۔ تمہارا دماغ خراب ہے، گنجا تو وہ سورہا ہے ۔ نائی نے گھبراکر کہا۔ ہائیں۔ تو یہ میرے سرکو کیا ہوا۔ شاید یہ فوجی کی شرارت ہے۔ تم یوں کرو کہ اس کا سرمونڈ دو ۔ معاملہ برا بر ہو جائے گا۔ نائی نے اسے مشورہ دیا کیسے مونڈ دوں میں نائی تھوڑا ہی ہوں۔ بھائی میں پینٹر ہوں پینٹر ،اچھا خیر تم سو جا ؤمیں خود ہی دیکھ لوں گا۔ نائی نے خدا کا شکرادا کیا اور پڑ کر سو گیا۔ اب جاگتے رہنے کی باری پینٹر کی تھی اسکو اپنے بالوں کا بہت افسوس تھا اور غصہ بھی بہت آرہا تھا۔ اس لئے اسے انتقام لینے کی نئی تد بیر سوجھی ۔

 اس نے اپنا برش نکالا۔ رنگوں کے ڈبے کھولے اور فوجی کے سر کے پاس بیٹھ کراسکے سر پر رنگوں سے نقش و نگار بنانےلگا پھر ایک اور خیال آنے پر اس نے فوجی کے سر پر سفیدرنگ پھیر دیا اور اس کالے رنگ سے ایک دیو کی شکل بنانے لگا۔ ابھی وہ کام مکمل ہی کر پایا تھا کہ چاند با دلو ںمیں چھپ گیا اور اندھیرے میں اسکا برش گنجے کے سر پر جا پہنچا۔ چاند بادلوں سے نکلا تو اس نے گنجے کے سر کو دیکھا اور حیران رہ گیا ۔ ارےدیو کی شکل کہاں گئی ۔ غائب ہو گئی ہاں بھی دیو ہی ٹھہرا، اچھا خیرمیں دوسری شکل بنا دیتا ہوں۔ وہ بڑبڑایا اور پھر گنجے کے سر پر بھی دیو کی خوفناک شکل بنانے لگا۔ جب تصویر مکمل ہو گئی تو اس کے جاگنے کا وقت ختم ہو گیا اور فوجی کو گنجا خیال کرتے ہوئے جگا دیا۔ کیا بات ہے تم نے بھی مجھے ہی جگا دیا ہے ، فوجی نے چلا کر کہا۔ تمہیں نہیں جگاؤں گا تو پھر کسے جگاؤں گا ۔ تمہاری باری ہے۔ آج کی رات بھی عجیب ہے پہلے نائی نے بجائے تمہارے مجھے جگا دیا اور اب پھر تم نے گنجے کی بجائے مجھے جگا دیا۔ کیا اندھے ہو میں فوجی ہوں ۔ کیا۔ تم فوجی ہو۔ پینٹر چلایا۔ ساتھ ہی اسکی نظر اسکے سر پر پڑی وہاں دیو کی شکل موجود تھی۔ اس نے جھٹ مڑ کر گنجے کے سرکو دیکھا وہاں کبھی ایک دیو کی شکل موجودتھی۔ ساری بات اسکی سمجھ میں آ گئی۔ اوہ! مجھے افسوس ہے تم سو جاؤ " اس نے فوجی سے کہا ، اور گنجے کو جگا دیا گنجے نے آنکھیں کھولیں تو اس کی نظر فوجی کے گنجے سر پر پڑی۔ اسنے غصے میں آ کر کہا: باری تو گنجے کی تھی اور تم نے جگا دیا مجھے۔"

 تم گنجے ہی تو ہو۔ بیوقوف ہوتم ،گنجا تو وہ تمہارے سامنے پڑاہے۔ بے وقوف میں نہیں تم ہو۔ وہ تو فوجی ہے ۔ ارے ! اس کے منہ سے نکلا۔ دوسرے ہی لمحے پینٹر لیٹ کر سو چکا تھا۔ اب جو گنجے نے ادھر ادھر ٹہل کر پہرہ دیناشروع کیا تو اس کی حیرت کا کوئی ٹھکانا نہ رہا۔ وہاں تو دوگنجے اور پڑے سورہے تھے۔ اس نے جلدی سے اپنے سر پر ہاتھ پھیراور بڑبڑایا۔

ہوں تومیں گنجا ہی مگر یہ دونوں گنجے کیسے بن گئے اور یہ فوجی کے سر کی خوفناک تصویربنی ہے۔" نیند کے عالم میں وہ کچھ سمجھ نہ سکا اور ٹہلتا رہا یہاں تک کہ صبح کی روشنی نمودار ہونے لگی۔ اسوقت اسے بھی نیند آگئی اور وہ پڑ کر سو گیا۔ اچانک شیر کی خوفناک دھاڑ نے ان چاروں کو جگا دیا، انکی آنکھیں کھلیں تو شیر کے بالکل پاس پہنچ چکا تھا ان کے ہوش اڑ گئے۔ گھبراہٹ میں فوجی اپنی بندوق  نہ سنبھال سکا وہ زمین پر سجدے کی شکل میں گر گیا۔ اس کی دیکھا دیکھی گنجے نے بھی یہی کیا۔ نائی کونئی ترکیب سوجھی اسنے پیٹی میں لگا ہوا اپنا استرا نکال لیا۔ پینٹرنے اسے استرالہراتے دیکھا تو وہ بھی جوش میں آگیا اوراپنابرش اٹھا کر اسے تلوار کی طرح گھمانے لگا شیر آگے بڑھا پینٹر بھی سجدے کی حالت میں زمین پر گر گیا اب شیر کی نظران کے سروں پر جو پڑی ہے تو بوکھلاکر پیچھے ہٹ گیا۔ اسنے اتنی عجیب غریب کھوپڑیاں آج تک نہیں دیکھی تھیں وہ ڈر گیا۔ وہ سمجھا یہ ضرور جن بھوت ہیں۔ اسی وقت نائی نے شیرکو پیچھے ہٹتے دیکھا تو ہمت کر کے استرالہراتا ہوا آگے بڑھا اور کہنے لگا آ،جاتا کہاں ہے بچوٗ! ہم جیسے شکاریوں سے بھی تمہیں زندگی میں پہلی بار واسطہ پڑا ہو گا۔ بھاگ نہیں۔ ابھی تو مجھے تمہاری شیو بنانی ہے نائی کی آواز سن کر انکے ہوش قدرے ٹھکانے آئے پینٹر اٹھا اور اپنا برش شیر کی طرف کر کے آگے بڑھنے لگا  شیر ایک ایک قدم پیچھے ہٹ رہا تھا۔ اسنے اتنے عجیب ہتھیار بھلاکہاں دیکھے تھے۔ وہ سمجھا یہ ضرور بہت خطرناک ہتھیار ہیں۔ اسی وقت گنجے کو اپنے ٹوکرے کا خیال آیا۔ اسنے ٹوکرے کو ڈھال کی مانند پڑ لیا اور شیر کی طرف بڑھنے لگا شیرٹو کرے کو دیکھ کر اور بھی گھبرایا یہ اسےسب سے زیادہ خطرناک ہتھیار لگا۔ فوجی ابھی تک تھرتھر کانپ رہا تھا۔ اس نے جو شیرکو پیچھے ہٹتے دیکھا تو جھٹ بندوق سیدھی کر لی اسی وقت شیر مڑا اور اسنے بھا گنے  کیلئے پہلی چھلانگ لگا ئی تھی کہ فوجی نے بندوق چلادی، بندوق چلنے کی آواز سارے جنگل میں گونج اٹھی ۔گولی شیر کے پیٹ میں لگی اور وہ وہیں گرکر دھاڑنے لگا شکاری نے احتیاطا ایک گولی اور چلادی جنگل کے سب جانور بیدار ہوگئے اور لگے چیخنے چلانے ۔۔۔

اور ادھر سے اُدھر بھاگنے لگے ۔ دوسری گولی شیر کی دم پر لگی اوراسکی دُم جسم سے الگ ہوکر زمین پر آرہی۔ اسی وقت شیر نے دم توڑ دیا۔ ان کی خوشی کا کوئی ٹھکانا نہ رہا ۔لگے اچھلنے کودنے اور شور مچانے ۔ پھر انہوں نے شیر کو گنجے کے ٹوکرے میں ڈالا۔ ایسے میں فوجی کا ہاتھ اپنے سرسے ٹکرا گیا وہ چونک اٹھا اور ہا تھ سر پر پھیرتا ہوانائی کو دیکھ کر ہنسنے لگا پھر اسکی نظر پینٹر کے سر پر پڑی وہ اور بھی بُری طرح ہنسنے لگا۔ پینٹر نے اپنے سر پر ہاتھ پھیرا اور وہ بھی ہنسنے لگا۔بسں پھر کیا تھا ہنس ہنس کر ان کا بُرا حال ہو گیا۔ انہوں نے مشکل سے ٹوکرا اٹھایا اور گاؤں کی طرف روانہ ہوگئے۔ تیسرے پہر کے قریب وہ گاؤں پہنچے تو دھوم مچ گئی۔ سارے کا سارا گاؤں شیر کو دیکھنے کیلئے امڈ آیا۔ لوگ شیر سے زیادہ نائی، گنجے اور پینٹر کو دیکھ کر خوش ہو رہے تھے انہیں اپنی آنکھوں پر یقین نہیں آرہا تھا۔ فوجی بہت دنوں تک انکے پاس رہا۔ اب وہ انکا دوست بن گیا تھا۔ اور اب تو لوگ نائی کے ہاں بال کٹوانے بھی آنے لگے تھے پینٹر سے رنگ بھی کرانے لگے تھے اور کہنے کو تو پہلے ہی مزدوری مل جایا کرتی تھی اسے اور بھی زیادہ مزدوری ملنے لگی۔ لوگ اس بہانے اسے شیر کے شکار کی ساری کہانی سنتے اور ہنستے ہنستے لوٹ پوٹ ہو جاتے ۔ اب ان کی بیویاں بھی ان سے خوش رہنے لگیں تھیں اور پھر ایک دن فوجی نے رخصت ہوتے وقت ان سے کہا تھا؟ میں جب بھی شکار کے لئے آیا کروں گا تم تینوں میرے ساتھ چلا کروگے۔

 ختم شد